મોહમ્મદ શમીને ન્યૂઝીલેન્ડમાં મળ્યા ખુશખબર, પરિવારમાં થયો દીકરીનો જન્મ

હેમિલ્ટન : ભારતીય ક્રિકેટ ટીમે ન્યૂઝીલેન્ડની ધરતી પર 5-0થી ટી20 સીરીઝ જીતી ઈતિહાસ રચી દીધો છે. આ દરમિયાન ટીમ ઈન્ડિયાના ફાસ્ટ બોલર મોહમ્મદ શમીને એક મોટી ખુશખબર મળી છે. મોહમ્મદ શમીના પરિવારમાં એક નાનકડી પરીનું આગમન થયું છે. મોહમ્મદ શમી (Mohammed Shami)એ હેમિલ્ટનથી આ ખુશખબર પ્રશંસકોને સાથે શૅર કરી છે.

મોહમ્મદ શમીના પરિવારમાં આવી નાનકડી પરી : મોહમ્મદ શમીએ પોતાના ઇન્સ્ટાગ્રામ હેન્ડલ પર બાળકીની તસવીર મૂકીને લખ્યું કે, મારા પરિવારમાં વધુ એક બાળકીનો જન્મ. વ્હાલી રાજકુમારી તને જન્મ મુબારક હો. તું લાડ અને પ્રેમની વચ્ચે મોટી થાય. દુનિયામાં તારું સ્વાગત છે. ભાઈના પરિવારને શુભચ્છાઓ.

અંગત જીવનમાં મુશ્કેલીમાં છે મોહમ્મદ શમી : નોંધનીય છે કે, મોહમ્મદ શમી કાકા બનવાથી તેના માટે આ સારા સમાચાર છે. મૂળે શમીના અંગત જીવનમાં ઘણી મુશ્કેલીઓ ચાલી રહી છે. શમી અને તેની પત્ની હસીન જહાંની વચ્ચે અણબનાવ છે.

હસીન જહાંએ શમી પર ફિક્સિંગ અને બીજી યુવતીઓ સાથે સંબંધો રાખવાનો આરોપ મુક્યો હતો. આ ઉપરાંત જહાંએ શમીના મોટા ભાઈ ઉપર પણ બળાત્કારનો આરોપ લગાવ્યો હતો. ત્યારબાદ તેના ભાઈની ધરપકડ પણ કરવામાં આવી હતી.

શમીનું પ્રદર્શન સુધર્યું : ભલે મોહમ્મદ શમીનું અંગત જીવન પાટા પરથી ઊતરી ગયું હોય પરંતુ તેમ છતાંય ક્રિકેટના મેદાન પર જોરદાર પ્રદર્શન કરી રહ્યો છે. મોહમ્મદ શમીએ ત્રણેય ફોર્મેટમાં કમાલની બોલિંગ કરી છે.

ટેસ્ટ ક્રિકેટની વાત કરીએ તો મોહમ્મદ શમીએ 12 મહિનામાં 7 ટેસ્ટમાં 31 વિકેટ લીધી છે. ટેસ્ટ રેન્કિંગમાં શમી 10મા નંબરે છે. વનડે ફોર્મેટમાં પણ શમીએ 18 મેચોમાં 37 વિકેટ ઝડપી છે. વર્લ્ડ કપમાં શમીનું પ્રદર્શન જોરદાર રહ્યું હતું. તેણે માત્ર 4 મેચમાં 14 વિકેટ ઝડપી હતી, જેમાં અફઘાનિસ્તાનની વિરુદ્ધ હેટ્રિક પણ સામેલ હતી.

ન્યૂઝીલેન્ડ પ્રવાસ દરમિયાન પણ મોહમ્મદ શમી એ ટી20 સીરીઝમાં પણ ભારતને જીત અપાવવામાં મહત્વની ભૂમિકા નિભાવી છે. શમીએ 3 મેચોમાં 2 જ વિકેટ લીધી પરંતુ હેમિલ્ટનમાં ત્રીજી ટી20માં તેણે છેલ્લી ઓવરમાં આખી મેચ પલટી દીધી.

આ મેચમાં શમીએ છેલ્લી ઓવરમાં વિલિયમસન અને રૉસ ટેલરને આઉટ કરી મેચને ટાઈ કરાવી દીધી. ત્યારબાદ મેચ સુપર ઓવરમાં ગઈ અને રોહિત શર્માએ છેલ્લા બે બોલ પર સિક્સર મારીને ભારતને રોમાંચક જીત અપાવી હતી.

આ મેચમાં મેન ઓફ ધ મેચ રોહિત શર્માને આપવામાં આવ્યો પરંતુ તેણે શમીને જીતનો અસલી હીરો ગણાવ્યો હતો.