વેસ્ટઈન્ડિઝના પ્રવાસ માટે ભારતીય ટીમની પસંદગી કરી લેવામાં આવી છે. વર્લ્ડ કપ સેમીફાઇનલમાં ન્યૂઝીલેન્ડની વિરુદ્ધ હાર્યા બાદથી આ પ્રવાસની ટીમ પસંદગીને લઈ ઘણી ઉત્સુક્તા હતી. ધોનીની નિવૃત્તિથી લઈને કોહલીને આરામ આપવાની અટકળો ચાલી રહી હતી. હવે જ્યારે ટીમ જાહેર થઈ ગઈ છે ત્યારે એક મોટો સવાલ સામે આવ્યો છે.
મૂળે, જ્યારે ઈંગ્લેન્ડમાં વર્લ્ડ કપ ચાલી રહ્યો હતો ત્યારે લગભગ 25 જૂને એક ન્યૂઝ સામે આવ્યા હતા કે ટીમ ઈન્ડિયાના કેપ્ટન વિરાટ કોહલી અને ફાસ્ટ બોલર જસપ્રીત બુમરાહ ઓગસ્ટમાં શરૂ થનારા વિન્ડીઝ પ્રવાસમાં ભાગ નહીં લે. ત્યારે કહેવાયું હતું કે બંનેએ અતિશય ક્રિકેટ રમવાના કારણે આરામ આપવામાં આવશે.
પરંતુ રવિવારે જે ટીમની પસંદગી કરવામાં આવી તેમાં ત્રણેય ફોર્મેટ માટે કોહલીને જ કેપ્ટન તરીકે જાહેર કરવામાં આવ્યો. બીજી તરફ બુમરાહ પણ ટેસ્ટ સીરીઝ રમવા વિન્ડીઝ જશે.
એવામાં સવાલ એ છે કે 25 જૂન બાદથી 22 જુલાઈ સુધીના એક મહિનાના સમયમાં એવું શું બદલાઈ ગયું કે વિરાટને વિન્ડીઝ ટુર માટે પસંદ કરવામાં આવ્યો.
વિરાટને કેપ્ટન્સી છીનવાઈ જવાનો ડર હતો? - વર્લ્ડ કપ સેમીફાઇનલમાં હાર્યા બાદ કોહલીની કેપ્ટન્સીને લઈને ઘણા સવાલ ઊભા થયા હતા. કેટલાકે તો ત્યાં સુધી કહી દીધું હતું કે સીમિત ઓવર ફોર્મેટમાં રોહિત શર્માને ટીમ ઈન્ડિયાનો કેપ્ટન બનાવવો જોઈએ. કોહલી અને રોહિત શર્મા વચ્ચે અબોલાની પણ ચર્ચાઓ તે સમયે ચાલી હતી.
એવામાં કોહલીને એ વાતનો ડર હતો કે જો તે વિન્ડીઝ પ્રવાસે નહીં જાય અને રોહિતને તેના સ્થાને કેપ્ટન્સી આપવામાં આવશે તો પછી ક્યાંક તેની કેપ્ટન તરીકે ટીમમાં વાપસી મુશ્કેલ ન થઈ જાય. આ વાતને અવગણી ન શકાય તેવી હતી.
ટીમ મેનેજમેન્ટે કોહલીને ચેતવણી આપી હતી? - કે પછી એવું તો નહોતું કે ચારે તરફ ટીકાઓ થયા બાદ ટીમ મેનેજમેન્ટે કોહલીને સંકેત આપ્યા હોય કે ટીમના કેપ્ટન તરીકે ચાલુ રહેવા માટે હજુ પણ પોતાની જાતને સાબિત કરવી જરૂરી છે. ત્યારબાદ કોહલીએ વિન્ડીઝ જવાનો નિર્ણય કરી દીધો.
બીજા સ્તરની ટીમના સ્થાને ભારતની મજબૂત ટીમ - માનવામાં આવી રહ્યું હતું કે વર્લ્ડ કપ બાદ મોટાભાગના સીનિયર ખેલાડી આરામ કરશે અને ભારતની બીજી સ્તરની ટીમ વિન્ડીઝનો પ્રવાસ કરશે, પરંતુ ટીમ ઈન્ડિયામાં ટૂંક સમયમાં બદલાયેલા સમીકરણો બાદ અંતે ભારતની મજબૂત ટીમને જ વિન્ડીઝ મોકલવાનો નિર્ણય કરવામાં આવ્યો.
