વિદેશી ટીમનો કપ્તાન બન્યો આ ભારતીય ખેલાડી, ICCએ પણ કર્યા વખાણ

અમેરિકા અને ઓમાનને પહેલી વખત ઈન્ટરનેશનલ વન ડે ટીમનો દરજ્જો મળી ગયો છે. ICCએ બુધવારે આની સત્તાવાર જાહેરાત કરી હતી. ICC મેન્સ ક્રિકેટ વર્લ્ડ કપ લીગ-2ના મુકાબલામાં ઓમાને પોતાની ત્રણે અને અમેરિકાએ બે મેચમાં જીત નોંધાવી હતી. અમેરિકાની આ જીતમાં ભારતીય પ્લેયરનો હાથ છે.

આઈસીસીએ ઓમાન અને અમેરિકાને વનડે ઈન્ટરનેશનલ ક્રિકેટનો દરજ્જો આપ્યા બાદ ટ્વીટર પર શુભકામના પણ પાઠવી છે. ICCએ અમેરિકાના કપ્તાન, ધ ફર્સ્ટ એવેન્જર્સના પોસ્ટરમાં એડિટ કરતા શુભકામના પાઠવી છે. આ સાથે જ ઓમાન ટીમનો ફોટો સોશિયલ મીડિયા પર પોસ્ટ કરી શુભકામના પાઠવી છે.

તમને જણાવી દઈએ કે, અમેરિકાની ટીમના કપ્તાન તરીકે રમી રહેલા સૌરભ નેત્રાવલકર ભારતની અંડર-19 ટીમનો ભાગ રહી ચુકેલો છે.

આ 27 વર્ષિય ખેલાડીએ મુંબઈ માટે રણજી મેચ રમી છે. સાથે 2010માં થયેલા અંડર-19 વર્લ્ડકપમાં ભારત માટે રમતા તેણે ઈંગ્લેન્ડ ટેસ્ટ ટીમના કપ્તાન જો રૂટ અને પાકિસ્તાન ખેલાડી અહમદ શહનાઝની વિકેટ પણ લીધી હતી. એક સમય એવો પણ આવ્યો કે, જ્યારે સૌરભે ક્રિકેટ વિશે વિચારવાનું પણ બંધ કરી દીધુ હતું. તેણે ખુદ કહ્યું હતું કે, ક્રિકેટને પૂરા બે વર્ષ આપ્યા પરંતુ તે કઈં ખાસ કરી શક્યો ન હતો.

ત્યારબાદ તેણે ભારતમાંથી જ એન્જિનિયરિંગમાં ગ્રેજ્યુએશન પુરૂ કર્યું અને GRE અને TOEFLની પરિક્ષા પણ આપી. પછી તે માસ્ટર્સના અભ્યાસ માટે કોર્નેલ જતો રહ્યો. ત્યાં ક્રિકેટના મેદાન પર તેણે એકવાર ફરી વાપસી કરી અને યૂએસમાં મળેલા અવસરનો ફાયદો ઉઠાવી ટીમનો કપ્તાન બની ગયો. (PC- BCCI)