મિતાલી રાજે આંતરરાષ્ટ્રીય ક્રિકેટમાં પૂરા કર્યા 10 હજાર રન, આવું કરનારી બીજી મહિલા ક્રિકેટર

ભારતીય મહિલા ક્રિકેટર મિતાલી રાજ (Mithali Raj) શુક્રવારે આંતરરાષ્ટ્રીય ક્રિકેટમાં 10,000 રન પૂરા કરનારી ભારતની પહેલી અને દુનિયાની બીજી મહિલા ક્રિકેટર બની ગઈ છે. ગત બે દશકથી પણ વધુ સમય થી ભારતીય મહિલા ક્રિકેટરની કર્ણધાર રહેલી મિતાલી રાજ શુક્રવારે આ સિદ્ધિ પ્રાપ્ત કરી છે. (Mithali Raj/Instagram)

મિતાલીએ દક્ષિણ આફ્રીકાની વિરુદ્ધ લખનઉના ઇકાના સ્ટેડિયમમાં ત્રીજી વનડે ઇન્ટરનેશનલ મેચ દરમિયાન 35મી ઓવર પૂરી કરતાં જ આ ઉપલબ્ધિ હાસલ કરી. તેના નામ પર હવે આંતરરાષ્ટ્રીય ક્રિકેટમાં 10,001 રન નોંધાઈ ગયા છે અને તેની સરેરાશ 46.73 છે. (Mithali Raj/Instagram)

ભારતીય ક્રિકેટ બોર્ડ (BCCI)એ તેની ઉપલબ્ધિ પર શુભેચ્છાઓ પાઠવતા કહ્યું કે, શું શાનદાર ક્રિકેટર છે. આંતરરાષ્ટ્રીય ક્રિકેટમાં 10 હજાર રન પૂરા કરનારી પહેલી ભારતીય મહિલા-બેટ્સમેન. અભિનંદન મિતાલી. (BCCI/Twitter)

આ 38 વર્ષીય ભારતીય મહિલા ક્રિકેટરથી પહેલા ઈંગ્લેન્ડની ચાર્લોટ એડવર્ડ્સે આ ઉપલબ્ધિ હાસલ કરી હતી. તેણે પોતાની આંતરરાષ્ટ્રીય કારકિર્દીમાં 309 મેચોમાં 10,273 રન કર્યા છે. (Mithali Raj/Instagram)

પોતાની 311મી આંતરરાષ્ટ્રીય મેચ રમી રહેલી મિતાલીએ ભારત તરફથી જૂન 1999માં વનડે દ્વારા આંતરરાષ્ટ્રીય ક્રિકેટમાં પદાર્પણ કર્યું હતું. તેણે અત્યાર સુધી 10 ટેસ્ટ મેચોમાં 51.00ની સરેરાશથી 663 રન, વનડેમાં 212 મેચોમાં 50.53ની સરેરાશથી 6,974 રન અને ટી20 આંતરરાષ્ટ્રીય 89 મેચોમાં 37.52ની સરેરાશથી 2,364 રન કર્યા છે. (Mithali Raj/Instagram)

મિતાલીએ પોતાની કારકિર્દીમાં રેકોર્ડ 75 અડધી સદી અને 8 સદી ફટકારી છે. તેમાંથી 54 અડધી સદી અને 7 સદી તેણે વનડેમાં કરી છે. ટેસ્ટ મેચોમાં તેણે એકમાત્ર સદી (214 રન) ઇંગ્લેન્ડની વિરુદ્ધ 2002માં ટૉટનમાં ફટકારી હતી. (Mithali Raj/Instagram)