છ દિવસમાં છ ગોલ્ડ મેડલ, આ ખેલાડીઓએ ભારતને અપાવી સોનેરી સફળતા

એશિયન ગેમ્સ-2018નો આજે છઠ્ઠો દિવસ છે. છ દિવસે ભારત 6 ગોલ્ડ મેડલ સહિત 24 મેડલ સાથે સાતમાં સ્થાને છે. ભારતે 5 સિલ્વર અને 13 બ્રોન્ઝ મેડલ મેળવ્યા છે. આ વખતે 6 ગોલ્ડ મેડલ કોને-કોને જીત્યા છે તેના ઉપર એક નજર.

પ્રથમ દિવસે રેસલર યોગેશ્વર દત્તે ગોલ્ડ મેડલ અપાવ્યો હતો. તેણે મેન્સ ફ્રીસ્ટાઇલ 65 કિગ્રામાં ગોલ્ડ જીત્યો હતો.

બીજો ગોલ્ડ રેસલર વિનેશ ફોગાટે અપાવ્યો હતો. વિનેશે વુમન્સ ફ્રીસ્ટાઇલ 50 કિગ્રામાં ગોલ્ડ મેડલ જીત્યો હતો.

શૂટિંગમાં સૌરભ ચૌધરીએ મેન્સ 10 મીટર પિસ્તોલમાં ગોલ્ડ જીત્યો હતો. આ શુટિંગનો આ વખતે પ્રથમ ગોલ્ડ હતો.

વુમન્સ 25 મીટર પિસ્તોલ ઇવેન્ટમાં રાહી સરનોબતે ભારતને ગોલ્ડ અપાવ્યો હતો.

છઠ્ઠા દિવસે રોઇંગ એટલે નૌકાયાનમાં ક્વાડરપલ સ્કલ્સમાં ભારતને ગોલ્ડ મેડલ જીત્યો હતો. આ ગોલ્ડ જીતનાર ટીમમાં દત્તુ ભોકાનલ, ઓમ પ્રકાશ, સ્વર્ણ સિંહ, સુખમીત સિંહ સામેલ હતા.

ટેનિસમાં મેન્સ ડબલ્સમાં રોહન બોપન્ના અને દિવિજ શરણે ભારતે ગોલ્ડ અપાવ્યો હતો. ભારતીય જોડીએ ફાઇનલમાં કઝાકિસ્તાનના એલેક્સેન્ડર બુબલક અને ડેનિસ યુવસેયેની જોડીને 6-3, 6-4થી હરાવી હતી.