વલસાડ: લગ્નમાં ડીજે પાર્ટીનું આયોજન કરનારા ધરમપુર તાલુકા BJP પ્રમુખને પોલીસે કરાવ્યું કાયદાનું ભાન
Valsad Police: ધરમપુર તાલુકા ભાજપ પ્રમુખ કેતન વાઢુના લગ્ન પ્રસંગે ધરમપુર તાલુકાના કુરગામમાં રાત્રે ડીજે પાર્ટી યોજાઇ હતી.
ભરતસિંહ વાઢેર, વલસાડ: વલસાડ જિલ્લા (Valsad district)ના ધરમપુર તાલુકા ભાજપના પ્રમુખ કેતન વાઢુ (Ketan Vadhu)ના લગ્ન પ્રસંગે યોજાયેલી ડીજે પાર્ટી (DJ party)માં મોટી સંખ્યામાં ભીડ એકઠી થતા પોલીસે લાલ આંખ કરી હતી. આ મામલે કાર્યવાહી કરતા પોલીસે તાલુકા ભાજપ પ્રમુખ સહિત 11 લોકો સામે ફરિયાદ દાખલ કરી કાયદેસરની કાર્યવાહી હાથ ધરી છે.
મહત્ત્વપૂર્ણ છે કે ધરમપુર તાલુકા ભાજપ પ્રમુખ કેતન વાઢુના લગ્ન પ્રસંગે ધરમપુર તાલુકાના કુરગામમાં રાત્રે ડીજે પાર્ટી યોજાઇ હતી. હાલ કોરોનાની મહામાચી ચાલી રહી છે ત્યારે સોશિયલ ડિસ્ટન્સિંગ (Social distancing) અને માસ્ક (Mask) પહેરવું ફરજિયાત છે. સાથે જ ભીડ એકઠી ન કરવા માટે પણ સરકાર તાકીદ કરે છે. આ સમય દરમિયાન કોવિડ 19ની ગાઈડલાઈનના પાલન માટે ફરજ પાડવામાં આવી રહી છે.
કોરોનામાં પરવાનગી સાથે યોજાતા લગ્નોમાં પણ ગણતરીના માણસોને હાજર રાખવાનો નિયમ હોવા છતાં વલસાડ જિલ્લાના ધરમપુર તાલુકા ભાજપ પ્રમુખે કોવિડ 19ની ગાઇડલાઇન લાગુ જ ન પડતી હોય તેમ લગ્ન દરમિયાન મોટી સંખ્યામાં લોકોને એકઠા કર્યા હતા. રાત્રે ડીજે પાર્ટીમાં સોશિયલ ડિસ્ટન્સિંગ અને કોરોના ગાઇડલાઇનના ધજાગરા ઉડ્યા હતા. મોટાભાગના લોકો માસ્ક વગર જ જોવા મળ્યા હતા.
આ બાબતે વલસાડ જિલ્લા પોલીસને જાણ થતાં જ ધરમપુર પોલીસ સ્થળ પર પહોંચી હતી. પોલીસ આવતા જ એક સમયે મામલો ગરમાયો હતો. પોલીસે ધરમપુર તાલુકા ભાજપ પ્રમુખ કેતન વાઢુને સબક શીખવવા અને નિયમોનું ભાન કરાવવા તેમના સહિત ડીજે પાર્ટીમાં ડીજેના સંચાલકો મળી કુલ 11 લોકો વિરુદ્ધ ફરિયાદ દાખલ કરી હતી. આ રીતે ધરમપુર તાલુકા ભાજપ પ્રમુખના લગ્ન પ્રસંગે યોજાયેલી ભીડમાં પોલીસે કાયદો બતાવ્યો હતો.
