ગુજરાતમાં બૂટલેગરો બેફામ, તાપીમાં પોલીસકર્મીને જીવતો સળગાવવાનો પ્રયાસ, બારડોલીમાં બાઈકને અડફેટે લીધી

તાપીઃ ગાંધીના ગુજરાતમાં દારૂબંધી છે પરંતુ ગુજરાતમાં (Gujarat) ખૂલ્લેઆમ દારુ વેચાય છે. બૂટલેગરો (Bootlegger) બેફામ બનતા હોવાની અનેક ઘટનાઓ છાશવારે બનતી હોય છે. આવી જ બે ઘટનાઓ દક્ષિણ ગુજરાતમાં બની હતી. જેમાં સોનગઢમાં બૂટલેગરો દ્વારા પોલીસની કાર સળગાવી હતી. એટલું જ નહીં એક જમાદારને કેરોસીન છાંટીને સળગાવવાનો પ્રયત્ન કર્યો હતો. જ્યારે બારડોલી નજીક બૂટલેગરે બાઈકને અડફેટે લીધી હતી. આ બંને ઘટનામાં પોલીસે ગુનો નોંધી વધુ તપાસ હાથધરી છે.

મળતી માહિતી પ્રમાણે તાપી જિલ્લાના સોનગઢ તાલુકમાં આવેલા મૈયાલી ગામમાં બૂટલેગરો બેફામ બન્યા હોવાની ઘટના શનિવારે મોડી સાંજે બની હતી. મળતી માહિતી પ્રમાણે ખાનગી કારમાં તાપી ડીવાયએસપી કચેરીના અધિકારીઓ ખાનગી કારમાં બૂટલેગરના ત્યાં રેડ પાડવા માટે ગયા હતા. જોકે, ઉશ્કેરાયેલા બૂટલેગરોએ પોલીસ અધિકારીઓ ઉપર હુમલો કર્યો હતો. આ ઉપરાંત ડીવાયએસપી કચેરીમાં ફરજ બજાવતા જમાદારને કેરોસીન છાંટીને સળગાવવાનો પ્રયત્ન કર્યો હતો. આ ઉપરાંત પોલીસ અધિકારીઓ જે કારમાં આવ્યા હતા એ કારને પણ બૂટલેગરોએ સળગાવી દીધી હતી.

આ ઘટનામાં ગંભીર રીતે ઘાયલ જમાદાર પ્રભાતસિંહ બારૈયાને સારવાર માટે સુરત ખસેડવામાં આવ્યા હતા. ઘટનમાં બૂટલેગર પણ દાઝી જતા ઈજા પહોંચી છે. ઘટનાની ગંભીરતા સમજી જિલ્લા પોલીસ વડાનો કાફલો પણ ઘટના સ્થળે દોડી આવ્યો હતો. આ ઘટનાના પગલે અફરા તફરી મચી ગઈ હતી.

અન્ય એક ઘટનામાં દક્ષિણ ગુજરાતમાં બારડોલી નગરના રામજી મંદિર નજીક બૂટલેગરોએ બાઈકને અડફેટે લીધી હતી. બૂટલેગરની કાર અને બાઈક વચ્ચે અકસ્માત સર્જાયો હતો. જેના પગલે બાઈક ચાલક ગંભીર રીતે ઈજાગ્રસ્ત થયો હતો. જેને સારવાર માટે સરદાર હોસ્પિટલ ખસેડવામાં આવ્યો હતો.

વધુ મળતી માહિતી પ્રમામે અકસ્માત બાદ કારની તપાસ કરતા કારમાથી વિદેશી બનાવટનો દારૂ મળી આવ્યો હતો. ઘટનાની જાણ થતાં જ ડીવાયએસપી સહિતનો કાફળો ઘટના સ્થળે પહોંચ્યો હતો. બારડોલી પોલીસે કાર ચાલક બૂટલેગરની ધરપકડ કરીને વધુ તપાસ હાથધરી હતી.