Black Saturday: રાજ્યમાં બે ગમખ્વાર અકસ્માત, 2 મહિલા સહિત પાંચના મોત - 7 ઘાયલ

રાજ્ય સહિત દેશભરમાં અકસ્માતની ઘટનામાં સતત વધારો થતો જાય છે. જેમ જેમ વાહનોની સંખ્યા વધતી જાય છે તેમ તેમ રોડ અકસ્માતની ઘટનાઓમાં સતત વધારો થતો જાય છે. વાહન ચાલકની નજીવી ભૂલના કારણે અનેક લોકોના અકસ્માતમાં કમોતે મોત થાય છે. આવી જ અકસ્માતની આજે બે ઘટનાઓ સામે આવી છે, જેમાં કુલ પાંચના મોત થયા છે.

સૌપ્રથમ ખેડા અકસ્માતની વાત કરીએ તો, ખેડા જિલ્લાના નડીયાદ તાલુકામાં મારૂતિવાન અને રિક્ષા વચ્ચે ગમખ્વાર અકસ્માત સર્જાયાની ઘટના સામે આવી હતી, જેમાં રિક્ષામાં સવાર 2 મહિલાઓના ઘટના સ્થળ પર જ મોત થયા છે, જ્યારે 4 લોકો ઘાયલ થયા હતા.

આ અકસ્માતની ઘટના નડીયાદની ડબાણ ચોકડી નજીક સર્જાઈ હતી. સૂત્રો અનુસાર, રિક્ષા ચાલક સીએનજી પંપ પર ગેસ પુરાવા માટે રોંગ સાઈડના રોડ પર જતા કાર ચાલકે ટક્કર મારી હતી, જેમાં બે મહિલાના સ્થળ પર મોત થયા હતી. આ ઘટનાની જાણ થતા પોલીસ સ્થળ પર આવી પહોંચી હતી, અને ઘાયલોને સારવાર માટે નજીકની હોસ્પિટલ ખસેડવામાં આવ્યા હતા. પોલીસે આ મામલે અકસ્માતનો ગુનો નોંધી કાયદેસરની કાર્યવાહી હાથ ધરી છે.

બીજી બાજુ તાપી જીલ્લામાં કાર ચાલકે સ્ટેરિંગ પરથી કાબુ ગુમાવતા ગમખ્વાર અકસ્માત સર્જાયો છે, જેમાં ત્રણ યુવકના મોત થયા છે, અને ત્રણ લોકો ઈજાગ્રસ્ત થયા છે. પ્રાપ્ત માહિતી અનુસાર, તાપિ જિલ્લાના વાલોદ બાજીપુરા હાઈવે પર કાર ચાલકે સ્ટેરિંગ પર કાબુ ગુમાવતા કાર કાર પલટી મારી ગઈ હતી, આ અકસ્માત એટલો ગંભીર હતો કે, ત્રણ યુવકના સ્થળ પર જ મોત થયા હતા, જ્યારે અન્ય ત્રણ યુવકને ગંભીર ઈજાઓ પહોંચી હતી.

પોલીસ સૂત્રો અનુસાર, વાલોદ બાજીપુરા હાઈવે પર એક કારમાં બેસી 6 જેટલા મુસ્લિમ યુવકો વાલોદથી બાજીપુરા તરફ કોઈ ધાર્મિક કાર્યક્રમમાં જતા હતા તે સમયે કાર ચાલકે સ્ટેરિંગ પરથી કાબુ ગુમાવતા અકસ્માત સર્જાયો છે. જેમાં ત્રણ યુવકના મોત નિપજ્યા છે, જ્યારે અન્ય ત્રણ યુવકોને ગંભીર ઈજા પહોંચી છે.

હાલમાં ત્રણે ઈજાગ્રસ્ત યુવકોને 108ની મદદથી બારડોલી અને સુરતની કાનગી હોસ્પિટલમાં સારવાર માટે ખસેડવામાં આવ્યા છે. પોલીસને મળેલી પ્રાથમિક માહિતી અનુસાર, ત્રણે મુસ્લિમ યુવક વાલોદના રહેવાસી હોવાનું સામે આવ્યું છે. પોલીસે અકસ્માતનો ગુનો નોંધી વધુ તપાસ હાથ ધરી છે.