તાપી-વ્યારાઃ બસ અને પિકઅપ વાન વચ્ચે અકસ્માત, બે બાળકીનાં મોત

તાપી જિલ્લાના વ્યારા માંડવી રોડ ઉપર બસ અને પીકઅપ વાન વચ્ચે અકસ્માત સર્જાયો હતો. જેના પગલે બે બાળકીના ઘટના સ્થળે મોત નીપજ્યા હતા. જ્યારે 10થી વધારે લોકોને ઇજાઓ પહોંચતા તેમને વ્યારા જનરલ હોસ્પિટલમાં ખસેડવામાં આવ્યા હતા. જ્યારે એક બાળકી ગંભીર હોવાથી તેને સુરત હોસ્પિટલમાં ખસેડવામાં આવી હતી. (નરેન્દ્ર ભુવચેત્રા, તાપી)

તાપી જિલ્લાના વ્યારા માંડવી રોડ ઉપર આવેલા ઉચામાલા ગામ પાસે આજે બુધવારે બસ અને પિકઅપ વાન વચ્ચે અકસ્માત સર્જાયો હતો. ગમખ્વાર અકસ્માતમાં બે બાળકીના ઘટના સ્થળે મોત નીપજ્યા હતા. જ્યારે 10થી વધુ લોકોને સામાન્ય ઇજાઓ પહોંચી હતી. આ ઉપરાંત એક બાળકીને ગંભીર ઇજાઓ થઇ હતી.

સુત્રોના જણાવ્યા પ્રમાણે શેરડી કાપવાં જતા મજૂર ભરેલી પીકઅપ વાનને કેએપીપી ટાઉનશીપની ખાનગી બસના ચાલકે પાછળથી ટક્કર મારતાં અકસ્માત સર્જાયો હતો.

અકસ્માતમાં ઇજાગ્રસ્તને સારવાર માટે વ્યારા જનરલ હોસ્પિટલમાં ખસેડાયા હતા. જ્યારે ગંભીર રીતે ઇજાગ્રસ્ત બાળકીને સુરત હોસ્પિટલ ખસેડવામાં આવ્યો હતા. કાકરાપાર પોલીસે અકસ્માતનો ગુનો નોંધીને વધુ તપાસ હાથધરી છે.