સુરત : Lockdownમાં ઘરે જવાની બાબતે ઝઘડાં થતા પતિએ કરી પત્નીની હત્યા, પોલીસ સ્ટેશને જઈ કબૂલ્યું 'પાપ'

કિર્તેશ પટેલ, સુરત : કોરોના વાયરસના વચ્ચે હાલમાં ચાલી રહેલા Lockdownની વચ્ચે સુરત શહેરમાં (Surat)માં એક હત્યાકેસ સામે આવ્યો છે. પતિ-પત્ની વચ્ચે વતન જવાની બાબતે થયેલા ઝઘડાએ ઉગ્ર સ્વરૂપે ધારણ કરી લેતા નરાધમ પતિએ ઢીકા અને મુક્કા મારીને પોતાની જ પત્નીને મોતને ઘાટ ઉતારી લેતા ચકચાર મચી ગઈ છે. બનાવની જાણ થતા જ પોલીસ કાફલો ઘટના સ્થળે દોડી આવ્યો હતો. પતિની નિષ્ઠુરતા એટલી કે તેણે પત્નીને મારી નાંખી અને અને તેનો છેલ્લો શ્વાસ છૂટ્યો ત્યારબાદ તેની લાશને નજીકના ખેતરમાં ફેંકી દીધી હતી.

બનાવની વિગત એવી છે કે સુરત નજીકના દેવત ગામમાં રહેતા એક દંપતી વચ્ચે વતન જવા બાબતે ઝઘડો થયો હતો. રોજી રોટીની તલાશમાં આવેલા આ પતિ-પત્નીએ પોતાના જ સાંસારિક માળામાં આગ ચાપતા પરીણિતાએ જીવ ગુમાવવાનો વારો આવ્યો છે.

ઘટના શહેરની નજીક આવેલા લિંબાયતની છે. જ્યાં શિવહરીસંગ યાદવ પરિવાર સાથે રહેતો હતો. જોકે, જ્યારથી લૉકડાઉન શરૂ થયુ ત્યારથી પત્ની વતન પરત જવા માટે સતત ઝઘડો કરતી હતી. યાદવે તેને સમજાવ્યું હતું કે તેનો નંબર નથી લાગતો છતાં ઝઘડા કાયમ રહેતા હતા.

દરમિયાન ગતરોજ ફરીથી પતિ-પત્ની વચ્ચે આ બાબતે ચકમક થઈ હતી. જોકે, બંને ઝઘડાથી કંટાળી અને દેવત ગામે ખેતરમાં કામે આવ્યા હતા ત્યારે પતિએ રોષ રાખી અને પત્નીને ઢીકા અને મુક્કા મારવાની શરૂઆત કરી હતી.

નરાધમ યાદવે પોતાની પત્નીનો જીવ છૂટ્યો નહીં ત્યાં સુધી તેને માર માર્યો હતો. અંતે તેણે પોતાની પત્નીને લાશને ખેતરમાં ફેંકી દઈ અને લિંબાયત પોલીસ મથકમાં જઈને પોતે જ હત્યા કર્યાની કબૂલાત કરી લીધી હતી.

પોલીસે યાદવને લઈને ઘટનાસ્થળે જઈ મૃતદેહનો કબ્જો મેળવી તેના પોસ્ટમોર્ટમની કાર્યવાહી કરી હતી. જ્યારે સમગ્ર ઘટના કેવી રીતે બની તેની ખેતરમાં જઈને વિગતવારે માહિતી લીધી હતી.

ઘટનાબાદ લિંબાયત પોલીસે હરીસંગ યાદવની ધરપકડ કરી અને તેની સામે કાયદેસરની કાર્યવાહી કરી છે. આજે જ્યારે રોજીરોટીની તલાશમાં આવેલા હજારો લોકો ઘરે પરત જઈ રહ્યા છે ત્યારે વતન વાપસીને વાટે બેઠેલી પત્નીને વતન તો ન મળ્યુ પરંતુ કફન મળ્યુ હતું.