નવસારી : ગણદેવીમાં ચકચારી હત્યા, પત્નીએ લાકડાના ફટકા મારી પતિનું ઢીમ ઢાળી દીધું

ભાવિન પટેલ, નવસારી : નવસારી જિલ્લાના (Navsari) ગણદેવીમાં (Gandevi) એક સનસનીખેજ હત્યા કેસ (Murder in Gandevi) સામે આવ્યો છે. અહીંયા કૌશીત ફળિયામાં રહેતા એક પુરૂષની તેની જ પત્નીએ (Wife killed Husband) હત્યા કરી નાંખી હોવાનું સામે આવ્યું છે. પતિ-પત્નીનો ઝઘડો એટલો ઉગ્ર થયો કે પત્નીએ તેના પતિને લાકડાનાં ફટકા મારીને મોતને ઘાટ ઉતારી દીધો છે. આ ઘટનામાં પોલીસે પત્નીને ઝડપી અને તેની પુછરપછ કરી છે.

પ્રાપ્ત અહેવાલ મુજબ પતિ અને પત્ની વચ્ચે લાંબા સમયથૂ ઝઘડો ચાલતો હતો. આ ઝઘડામાં ગઈકાલે વધુ ઉગ્ર બોલાચાલી થઈ હતી. દરમિયાન પતિ સાથે ઝઘડો થતા ઉશ્કેરાયેલી પત્નીએ તેને ફટકા મારવાના શરૂ કરી દીધા હતા. દરમિયાન પ્રાપ્ત અહેવાલો મુજબ પતિને મુઢ માર લાગતા ગંભીર ઇજાઓ થઈ હતી.

પત્નીના મારના કારણે પતિનું મૃત્યુ થતા મામલો પોલીસ મથકે પહોંચ્યો હતો. પોલીસે ઘટનાની તપાસના આધારે આરોપી મહિલાને ઝડપી પાડી છે. સ્થાનિકોના જણાવ્યા મુજબ આ મહિલાએ તેની સાસુને પણ મારવાની કોશિષ કરી હતી.

સામાન્ય રીતે પતિના મારના કારણે મહિલાઓનું મૃત્યુ થયું હોય તેવા અનેક બનાવો સામે આવતા હોય છે પરંતુ નવસારીનો આ બનાવ ઉલટી ગંગા જેવો છે. આ કિસ્સામાં પત્નીએ જ તેના પતિને મોતને ઘાટ ઉતારી દીધો છે. જોકે, આ કિસ્સામાં પોલીસની સઘન તપાસના અંતે જ સત્ય સામે આવી શકે છે.

પોલીસને મળેલી પ્રાથમિક માહિતી મુજબ મહિલા ઉગ્ર સ્વભાવની અને માનસિક રીતે થોડી વ્યાકુળ હોવાનું જાણવા મળ્યું છે. મહિલા તેના પતિ સાથે સાસુ પર પણ હુમલો કરવાનો પ્રયાસ કર્યો હોવાનું પાડોશીઓ જણાવી રહ્યા છે પરંતુ હાલમાં આ બાબતની પુષ્ટી થઈ નથી. ગણદેવી પોલીસે બનાવના પગલે આરોપી મહિલાની અટકાયત કરી અને આગળની કાર્યવાહી કરી છે.