સુરતઃ ગણપતિ યાત્રા દરમિયાન વીજ કરંટ લાગતા એકનું મોત, 6ને હોસ્પિટલમાં ખસેડાયા

શહેરમાં બુધવારે સાંજે ગણપતિ યાત્રા દરમિયાન વીજ કરંટ લાગતા એક વ્યક્તિનું મોત થયું છે. અન્ય છ લોકોને સારવાર માટે હોસ્પિટલમાં ખસેડવામાં આવ્યા છે. શહેરમાં બુધવારે સાંજે અનેક જગ્યાએ ગણપતિ યાત્રાઓ નીકળી હતી ત્યારે આ બનાવ બનતા ભક્તજનોમાં દુઃખની લાગણી વ્યાપી હતી. (સ્ટોરીઃ પ્રજ્ઞેશ પટેલ, સુરત)

મળી રહેલી માહિતી પ્રમાણે સુરત શહેરના લિંબાયત વિસ્તારના આસ્તિક નગર ખાતે ગણપતિ યાત્રા દરમિયાન આ દુર્ઘટના ઘટી હતી. યાત્રા દરમિયાન લોખંડનો પાઇટ વીજ લાઈનના ડીપીને અડી જતાં અનેક લોકોને કરંટ લાગ્યો હતો.

વીજ કરંટ લાગવાને કારણે એક વ્યક્તિનું મોત થયું હતું, તેમજ છ લોકો ઘાયલ થયા હતા. ઘાયલ થયેલા લોકોને સુરતની સ્મીમેર હોસ્પિટલમાં સારવાર માટે ખસેડવામાં આવ્યા છે.

આજે એટલે કે ગુરુવારે શરૂ થયેલા ગણેશ ઉત્સવ માટે બુધવારે રાત્રે જ શહેરના અનેક વિસ્તારોમાં ગણેશજીની પધરામણી થઈ હતી. એક અંદાજ પ્રમાણે શહેરમાં 65 હજાર જેટલી ગણેશની મૂર્તિઓનું સ્થાપન કરવામાં આવ્યું છે.