દક્ષિણ ગુજરાતના ખેડૂતોની હાલત કફોડી: વરસાદથી ડાંગરના પાકને 100 કરોડના નુકસાન

પ્રજ્ઞેશ વ્યાસ, સુરતઃ એક સપ્તાહથી સુરત સહિત સમગ્ર દક્ષિણ ગુજરાતમાં (south Gujarat) પડી રહેલા ધોધમાર વરસાદને (Heavy Rainfall) કારણે ખેડૂતોની (Farmers) દશા કફોડી થઈ ગઈ છે. ખાસ કરીને ચોમાસું ડાંગર (Monsoon paddy) પકવતા ખેડૂતોનો પાક પાણીમાં ગરકાવ થતા મોટું નુકસાન (loss) વેઠવાનો વારો આવ્યો છે. એક અંદાજ મુજબ દક્ષિણ ગુજરાતના ખેડૂતોના રૂ. 100 કરોડના ડાંગરના પાકને નુકસાન થયુ છે. જેને લઈને દક્ષિણ ગુજરાત ખેડૂત સમાજ દ્વારા સરકારને પાક વીમા હેઠળ નુકસાન વળતર આપવા માટે માંગણી કરવામાં આવી છે.

દક્ષિણ ગુજરાત ખેડૂત સમાજના પ્રમુખ રમેશ પટેલના જણાવ્યા પ્રમાણે, એક અઠવાડિયામાં વરસેલા વરસાદના કારણે દક્ષિણ ગુજરાતના ખેડૂતના ડાંગરના ઉભા પાક પર પાણી ફરી વળતાં મોટું નુકસાન થયું છે.

હાલ ડાંગરની સિઝનના કારણે એક અંદાજ પ્રમાણે રૂ.500 કરોડથી વધુના ડાંગર તૈયાર થતાં હોઈ છે. આ પ્રથમ મોટા ઝાપટાના કારણે જ 25 ટકા પાક એટલે કે રૂ.100 કરોડનુ 2થી 3 લાખ ખેડૂતોને નુકસાન થઈ ચૂક્યું છે.

સરકાર દ્વારા અનલોક-2ના સમયગાળા દરમિયાન ખેડૂતોના પાકને નુકસાન સામે વળતર આપવાની યોજના જાહેર કરવામાં આવી હતી. જોકે, આ યોજનાની શરતો હેઠળ અમુક મર્યાદાથી વધુ વરસાદમાં પાકને થયેલા નુકસાન પર સરકાર વળતર આપી રહી છે.

દક્ષિણ ગુજરાતમાં 9થી 10 ઈંચ વરસાદમાં જ પાકને મોટું નુકસાન થયું છે. ત્યારે આવનારા દિવસમાં વધુ વરસાદ પડે તો વધુ પાકને નુકસાન થાય તેવી ચિંતા સેવાઈ રહી છે.

આવા સંજોગોમાં સરકાર ખેડૂતોને કોરોના પછીના કપરા સમયમાં મદદ કરે તેવી અમારી રજૂઆત છે. ઉલ્લેખનીય છેકે દક્ષિણ ગુજરાતનો મુખ્યપાકજ શેરડી અને ડાંગર છે. જો એમા નુકસાન આવે તો ખેડુતોની હાલત કફોડી થાય છે.