1/ 6
કિર્તેશ પટેલ, સુરતઃ શહેરના પાંડેસરા વિસ્તારમાં (Pandesara) રહેતા આધેડ મહિલા આરોગ્ય કેન્દ્રમાં (health center) કોરોનાની વેક્સીન (corona vaccine) મુકાવવા જતા હતા ત્યારે ભેટી ગયેલા ત્રણ ગઠિયા દાન અપાવવાના બહાને વાતોમાં ભોળવી રૂ.40 હજારના દાગીના (Gold jewellery) સેરવી ફરાર થઇ ગયા હતા.
2/ 6
મૂળ મહારાષ્ટ્રના વતની અને સુરતમાં પરિવાર સાથે પાંડેસરા હાઉસીંગ પત્રકાર કોલોની સામે ગણેશનગર પ્લોટ નં. 80માં રહેતા 56 વર્ષીય યશોદાબેન સયાજીભાઇ પાટીલ ગત 19મીની સાંજે ચાર વાગ્યે પાંડેસરા કૈલાશનગર ચોકડી પાસે આરોગ્ય કેન્દ્રમાં કોરોનાની રસી મુકાવવા જતા હતા.
3/ 6
ત્યારે રસ્તામાં માથે નાનો કેસરી ચાંલ્લો કરેલા યુવાને અટકાવી મરાઠીમાં કહ્યું હતું કે માસી મારા શેઠને ત્યાં 30 વર્ષ બાદ છોકરો થયો છે, તમે દાન લીધું? તે સાડી, કપડાં, ચંપલ અને રાશન દાનમાં આપે છે.
4/ 6
યશોદાબેનના ઇન્કાર છતાં તે યુવાને તેમની પાછળ આવી ફરી તેમને દાન લેવા કહી પોતાની સાથેના 25થી 30 વર્ષના યુવાનને કહ્યું હતું કે માસીને જગ્યા ઉપર લઇ જા. તે યુવાને યશોદાબેનને સાથે આવવા કહેતા જ તેમનું માથું ભારે થઇ ગયું હતું અને તે યુવાન સાથે ચાલવા માંડ્યા હતા.
5/ 6
તે યુવાન યશોદાબેનને તેમની સોસાયટી નજીક દવાની દુકાનના ઓટલા પાસે લઇ ગયો હતો અને ત્યાં બેસાડયા ત્યારે માથે ચાંલ્લાવાળા યુવાને આવી તમે દાગીના પહેરી આવશો. તો દાન નહીં આપશે કહી દાગીના ઉતારી પર્સમાં મુકવા કહેતા યશોદાબેને રૂ.40 હજારની કિંમતના દાગીના ઉતારી પર્સમાં મુક્યા હતા.
6/ 6
ત્યારે ત્રીજા વ્યક્તિ હાથમાં થેલી લઇ આવ્યો હતો અને તેમાં પર્સ મુકવા કહેતા યશોદાબેને ઇન્કાર કર્યો તો સામેની દુકાનના ઓટલા પાસે લઇ ગયા ત્યારે ફરી તેમનું માથું ભારે થઇ ગયું હતું. તે સમયે જ ત્રણેય નજર ચૂકવી દાગીના સાથેનું પર્સ સેરવી ફરાર થઇ ગયા હતા. બનાવ અંગે યશોદાબેને ગતરોજ પાંડેસરા પોલીસ મથકમાં ફરિયાદ નોંધાવતા પોલીસે અગાઉ આવા ગુનામાં ઝડપાયેલાઅોની તપાસ હાથ ધરી છે.
