રાજકોટની શરમજનક ઘટના! 21 વર્ષની અપંગ સાવકી દીકરી સાથે સાવકા પિતાએ આચર્યું દુષ્કર્મ

અંકિત પોપટ, રાજકોટઃ રાજકોટઃ રાજકોટ જિલ્લામાં (Rajkot) એક ચોંકાવનારો કિસ્સો સામે આવ્યો છે. પાલક પિતાએ પોતાની સાવકી દીકરી (step daughter) સાથે બે વખત દુષ્કર્મ આચર્યું હોવાની ફરિયાદ આટકોટ પોલીસ (Aatkot police) ખાતે નોંધાઇ છે. ત્યારે સમગ્ર મામલે આટકોટ પોલીસ દ્વારા હૈવાન પિતાની ધરપકડ કરવામાં આવી છે.

સામાન્યતઃ સ્ત્રીઓ પર અત્યાચાર સૌથી વધુ તેના પરિચિત વ્યક્તિઓ જ કરતા હોય છે. આ વાત ખુદ થોડા સમય પહેલા રાજ્યના ગૃહમંત્રી હર્ષ સંધવી પણ જાહેર મંચ પરથી કરી ચૂક્યા છે. ત્યારે આ જ પ્રકારનો કિસ્સો સામે આવ્યો છે જસદણના મોટા દડવા ગામ ખાતે.

મૂળ વિસાવદરની વતની અને છેલ્લા છ મહિનાથી પોતાના પાલક પિતા અને માતા સાથે રહેતી 21 વર્ષીય યુવતીએ પોતાની સાથે પોતાના પાલક પિતાએ દુષ્કર્મ આચર્યું હોવાની પોલીસ ફરિયાદ નોંધાવી છે.

યુવતીએ પોલીસ ફરિયાદમાં જણાવ્યું છે કે ગત પાંચ એપ્રિલના રોજ જ્યારે તેની માતા કોઈ કામ અર્થે બહાર ગઈ હતી. ત્યારે પાલક પિતાએ તેણી સાથે બળજબરીપૂર્વક દુષ્કર્મ આચર્યું હતું. તેમજ દુષ્કર્મ આચર્યા બાદ ધમકી આપી હતી. કે જો તું આ મામલે કોઈને કહીશ તો તને જાનથી મારી નાખીશ.

ત્યાર બાદ ફરી એક વખત સાથ એપ્રિલના રોજ પાલક પિતાએ દીકરી ઘરમાં એકલી હોય તેની એકલતાનો લાભ ઉઠાવી ફરી એક વખત તેની સાથે બળજબરી પૂર્વક દુષ્કર્મ આચર્યું હતું. માત્ર ત્રણ દિવસના ગાળામાં પોતાની સાથે બનેલ બે બે વખત દુષ્કર્મની ઘટના અંગે આખરે અપંગ દીકરીએ પોતાની માતાને જાણ કરી હતી.

ત્યારબાદ માતા અને યુવતી પોલીસ સ્ટેશને દોડી ગયા હતા અને પોતાના જ સાવકા પિતા વિરુદ્ધ પોલીસ ફરિયાદ નોંધાવી હતી. હાલ આટકોટ પોલીસ દ્વારા રિક્ષા-ડ્રાઇવર એવા હેવાન પિતાની ધરપકડ કરી છે. તેમજ પોલીસ દ્વારા આરોપીની મેડિકલ પ્રક્રિયા પણ કરવામાં આવી હોવાનું જાણવા મળી રહ્યું છે.