સહિ પોષણ-દેશ રોશન: પીએમ મોદીના હાથે ચિલ્ડ્રન ન્યુટ્રિશન પાર્ક ખુલ્લો મૂકાયો

અમદાવાદ: વડાપ્રધાન મોદીએ આજે કેવડિયા ખાતે ચિલ્ડ્રન ન્યૂટ્રિશન પાર્કને ખુલ્લો મૂક્યો હતો. સાથે સાથે પીએમ મોદીએ એક્તા મોલને પણ ખુલ્લો મૂક્યો હતો. ચિલ્ડ્રન ન્યૂટ્રિશન પાર્કની વાત કરીએ તો અદ્યતન ટેક્નોલોજી સંચાલિત વિશ્વનો સૌ પ્રથમ ચિલ્ડ્રન ન્યુટ્રિશન પાર્ક છે. આ થીમ બેઝ પાર્ક 35,000 ચો.મી. વિસ્તારમાં પથરાયેલો છે. આ પહેલા તેઓ દિલ્હીથી સીધા અમદાવાદ એરપોર્ટ ખાતે આવી પહોંચ્યા હતા. અહીથી તેઓએ ગાંધીનગર ખાતે કેશુભાઈ પટેલ અન મહેશ-નરેશના પરિવારના સભ્યોને સાંત્વના આપી હતી. જે બાદમાં તેઓ ગાંધીનગર ખાતેથી સીધા જ  હેલિકોપ્ટર મારફતે  કેવડિયા પહોંચ્યા હતા. અહીં તેઓએ એક પછી એક પ્રકલ્પોનું લોકાર્પણ કર્યું હતું.

અહીં બાળકોને જ્ઞાન સાથે ગમ્મત મળી રહે તેવા હેતુથી અદ્યતન ટેક્નોલોજીનો ઉપયોગ કરી આ પાર્ક ખાસ ડિઝાઈન કરવામાં આવેલો છે. જેમાં બાળકો મીની ટ્રેન દ્વારા 600 મીટર પ્રવાસ કરે છે.

પ્રવાસ દરમિયાન ફળ-શાક ગૃહમ્, પાયોનગરી, અન્નપૂર્ણા, પોષણપુરમ્, સ્વસ્થ ભારતમ્ અને ન્યુટ્રી હંટ જેવા સ્ટેશનો આવે છે. આ સ્થળોમાં જુદી જુદી ૪૭ જેટલી ટેકનોલોજીનો ઉપયોગ કરી બાળકોને મનોરંજનની સાથે માહિતી મળે અને ‘‘સહિ પોષણ-દેશ રોશન’’ ચરિતાર્થ થાય તે પ્રયાસ કરવામાં આવ્યો છે.

વધુમાં નાના-મોટા તમામ પ્રવાસીઓને મનોરંજન માટે મીરર મેઈઝ, 5-D થિયેટર,ભૂલ-ભુલૈયાં પણ છે.

એક્તા મોલ: દેશ-વિદેશના પ્રવાસીઓ કેવડિયાની મુલાકાત દરમિયાન ખરીદીનો વિશિષ્ટ પ્રકારનો અનુભવ લઈ શકે તે માટે બે માળ અને 35,000 ચોરસ ફુટમાં પથરાયેલા વિશાળ એકતા મોલનું નિર્માણ કરવામાં આવ્યું છે. જેમાં દેશના જુદાજુદા રાજયોમાંથી 20 જેટલા પરંપરાગત હેન્ડલુમ અને હેન્ડીક્રાફટ એમ્પોરીયા છે.

એકતા મોલમાં દેશના જુદા જુદા રાજ્યોની વખણાતી ચીજવસ્તુઓ એક જ જગ્યાએથી ખરીદીનો પ્રવાસીઓ આનંદ માણે છે. જેમાં ગરવી ગુર્જરી, પુરબશ્રી, કૈરાલી, મુર્ગનૈની, પુમ્પુહર, ગંગોત્રી, કાવેરી, ખાદી ઈન્ડિયા, કાશ્મીર અને CCI એમ્પોરિયમ આવેલું છે.

તસવીર: ચિલ્ડ્રન ન્યુટ્રિશન પાર્ક

તસવીર: ચિલ્ડ્રન ન્યુટ્રિશન પાર્ક

તસવીર: ચિલ્ડ્રન ન્યુટ્રિશન પાર્ક