રાજ્યમાં જામ્યો વરસાદી માહોલ; નર્મદા ડેમની સપાટીમાં સતત વધારો, ઉકાઈ ડેમમાંથી પણ પાણી છોડાયું

ગાંધીનગર: ગુજરાતમાં હાલ વરસાદનો ત્રીજો રાઉન્ડ (Gujarat rain season) ચાલી રહ્યો છે. બીજી તરફ હવામાન વિભાગ (Meteorological Department) તરફથી આગામી ત્રણ દિવસ ગુજરાતમાં ભારે વરસાદની આગાહી (Heavy rain forecast) આપવામાં આવી છે. પાડોશી રાજ્ય મધ્ય પ્રદેશ (Madhya Pradesh heavy rain)માં પણ સારો વરસાદ પડી રહ્યો હોવાથી નર્મદા ડેમ (Narmada Dam)ની સપાટીમાં સતત વધારો નોંધાઈ રહ્યો છે. સરદાર સરોવર (Sardar Sarovar)ની સપાટીમાં દર કલાકે પાંચ સેન્ટિમીટરનો વધારો થઈ રહ્યો છે. હાલ નર્મદા ડેમની જળ સપાટી 132.74 મીટરે પહોંચી છે. પાણીની સપાટી હજુ પણ વધી શકે છે. મધ્ય પ્રદેશમાં સારા વરસાદને કારણે આ વખતે ડેમ સંપૂર્ણપણે ભરાઈ શકે છે. ડેમ તેની મહત્તમ જળ સપાટી 138.68 મીટરથી 5.94 મીટર દૂર છે. (ફાઇલ તસવીર, Shutterstock)

સુરત: દક્ષિણ ગુજરાતની જીવાદોરી સમાન ઉકાઈ ડેમમાંથી તાપી નદીમાં પાણી છોડવામાં આવ્યું છે. ઉકાઈ ડેમમાંથી 1.75 લાખ ક્યુસેક પાણી છોડાતા તાપી નદી બે કાંઠે વહી રહી છે. બીજી તરફ બારડોલીના હરિપુરાનો લૉ લેવલ કોઝવે ચાલુ સીઝનમાં છઠ્ઠી વખત પાણી ગરક થઈ ગયો છે. કોઝવે પાણીમાં ગરક થતા બીજી બાજુઆ આવેલા 12 જેટલા ગામો બારડોલીનાં મુખ્યમાર્ગથી સંપર્ક વિહોણા બન્યા છે.

નર્મદા જિલ્લામાં વરસાદનો ત્રીજો રાઉન્ડ: બીજી તરફ નર્મદા જિલ્લામાં વરસાદની ત્રીજો રાઉન્ડ શરૂ થયો છે. મોડી રાત્રિથી જિલ્લાના પાંચેય તાલુકામાં વરસાદ પડી રહ્યો છે. જિલ્લામાં રાત્રે 3 વાગ્યા સરવારના છ વાગ્યા સુધી દોઢ ઇંચ જેટલો વરસાદ પડ્યો છે.

મહીસાગર: મહીસાગર જિલ્લામાં આવેલા કડાણા ડેમનું લેવલ 396.04 ફૂટે પોહચ્યું છે. હાલ ડેમમાં 41,410 ક્યુસેક પાણીની આવક થઈ રહી છે, તેની સામે ડેમમાંથી 5,300 ક્યુસેક પાણી છોડવામાં આવી રહ્યું છે. કડાણા ડેમની ભયજનક સપાટી 419 ફૂટ છે. (Shutterstock તસવીર)

મહિસાગર: જિલ્લાના ખાનપુર તાલુકામાં આવેલાં ભાદર ડેમની સપાટી 119.90 મીટર પર પહોંચી છે. ડેમમાં હાલ 220 ક્યુસેક પાણીની આવક થઈ રહી છે. ભાદર ડેમમાં પાણીની આવક વધતા લોકોમાં ખુશીનો માહોલ છવાયો છે. ડેમની ભયજનક જળસપાટી 123.72 મીટર છે. (ફાઇલ તસવીર)

મહેસાણા: ઉત્તર ગુજરાતની જીવાદોરી સમાન ધરોઈ ડેમમાં પાણીની આવકમાં સતત વધારો નોંધાઈ રહ્યો છે. ધરોઈ ડેમમાં હાલમાં 27,500 ક્યુસેક પાણીની આવક થઈ રહી છે. ધરોઈ ડેમની સપાટી 605.90 ફૂટ પર પહોંચી છે.

રાજકોટ: શહેરના વાતાવરણમાં પલટો જોવા મળ્યો છે. વહેલી સવારે શહેરના મોટાભાગના વિસ્તારમાં વરસાદી માહોલ જોવાયો હતો. માધાપર ચોકડી, ગોંડલ ચોકડી, મવડી ચોકડી, ત્રિકોણ બાગ, જામનગર રોડ, નાના મૌવા સર્કલ, આનંદ બંગલા ચોક, ઢેબર રોડ, ગોંડલ રોડ, મોરબી રોડ, વેલનાથ પરા સહિતના વિસ્તારોમાં વરસાદ પડ્યો હતો. સવારના 7 વાગ્યાથી 8 વાગ્યા સુધીમાં શહેરમાં 0.24 ઇંચ વરસાદ ખાબક્યો હતો.