સાબરકાંઠા જિલ્લામાં સાર્વત્રિક વરસાદ, નદી-નાળા થયા ઓવરફ્લો

ઈશાન પરમાર, સાબરકાંઠા: ગુરૂવારથી સાબરકાંઠા જીલ્લામાં ધોધમાર વરસાદ વરસી રહ્યો છે, જેના કારણે જીલ્લાના અનેક ચેકડેમ, નદી- નાળાઓ કોઝવે પર પાણી ફરી વળ્યા છે. કોઝવે પર પાણી આવતા જ અવર જવર બંધ થઈ જતા જ વાહન ચાલકોને મુશ્કેલીનો સામનો કરવો પડી રહ્યો છે. તો તંત્ર દ્રારા પણ લોકોને પાણીમાં ન જવાની સુચનાઓ અપાઈ રહી છે. પોશીનાની સેઈ અને પનારી નદી, વડાલીની ગૌવાઈ નદી, ખેડબ્રમ્હાની હરણાવ નદી અને હિંમતનગરની હાથમતી નદી પણ બે કાંઠે વહેતી થઈ છે.

સાબરકાંઠા જીલ્લામાં ઉપરવાસમાં ભારે વરસાદને લઈને ખેડવા ડેમમાં ભારે પાણીની આવક થઈ છે અને ડેમમાંથી 1200 ક્યુસેક પાણી હરણાવ નદીમાં છોડવામાં આવ્યુ છે અને જેને કારણે હરણાવ નદી બે કાંઠે વહેતી થઈ છે તો લોકોના ટોળે ટોળા પણ ઉમટી પડ્યા છે તો તંત્ર દ્રારા કોઈને નદીના વિસ્તારમાં ન જવાની સુચના પણ આપી છે.

સાબરકાંઠા જીલ્લામાં ધોધમાર વરસાદ વરસી રહ્યો છે અને હવામાન વિભાગે પણ આગાહી આપી છે કે, હજુ પણ ધોધમાર વરસાદ પડી શકે છે, ત્યારે હિંમતનગરના હાથમતી વેસ્ટ વિઅરમાં પાણીની આવકમાં ધરખમ વધારો થતા કેનાલમાં 350 ક્યુસેક પાણી છોડવામાં આવી રહ્યુ છે. જેને લઈ તંત્ર દ્રારા નિચાણવાળા વિસ્તારમાં એલર્ટ પણ અપાયુ છે કે કોઈએ કેનાલમાં પસાર થયુ નહી.

તો પ્રાંતિજના તાજપુર કુઈ ગામે એક મકાનના પાછળના ભાગે આવેલ દીવાલ ધરાશાઈ થઈ હતી, સદ્દનશીબે કોઈ જાનહાની નોધાઈ નથી, પરંતુ બે દિવસથી પડી રહેલ ધોધમાર વરસાદને લઈને આ મકાન ધરાશાઈ થયુ હોય એમ લાગી રહ્યુ છે.

હિંમતનગરની વાત કરીએ તો, નીચાણવાળા વિસ્તારમાં પાણી ભરાયા હતા તો રેલ્વે અંડર પાસમાં પણ પાણી ભરાયા હતા. આ ઉપરાંત અનેક સોસાયટીમાં પણ પાણી ભરાઈ ગયા હતા. મોતીપુરા સી.એન.જી પંપ પાસે પાણી ભરાયા હતા. તો આસપાસના ગામડા હડિયોલ- ગઢોડાના ખેતરોમાં પણ પાણી ભરાવાને કારણે ખેડુતોને નુકશાન જોવા મળ્યુ છે. આ બાજુ હિંમતનગરની દેવધન સોસાયટીના રોડ પર મોટો ભુવો પડ્યો હતો. નોંધનીય છે કે, પાલિકાનો રોડકામના થયેલો ભ્રષ્ટાચાર છતો થયો હોય એમ લાગી રહ્યુ છે તો ભુવો પુરવા માટે આવેલી પાલિકાની ગાડી પણ ભુવામાં ઘરકાવ થઈ હતી અને સોસાયટીના રહિશોમાં પાલુકાની કામગીરીને લઈને રોષ જોવા મળ્યો હતો.

હિંમતનગરનો રાજપુર- ચોટીલા કોઝવે પાણીમાં ઘરકાવ થયો હતો. નોધનીય છે કે, ચોટીલા ખાતે શિવજીનુ પ્રાચિન મંદિર છે અને હાલ શ્રાવણ માસ ચાલી રહ્યો છે તો ભક્તોને અવર જવરમાં ભારે મુશ્કેલી પડી રહી છે. તો લોકો પણ અટવાયા હતા.

સાબરકાંઠાના વડાલી પાસે આવેલ ધરોદ ગામ તરફ જતો ચેકડેમ છલકાયો હતો અને ચેકડેમથી પાણી રોડ પર આવતા એક ગામથી બીજા ગામ જવાથી બંધ રહ્યુ હતુ તો ધરોદ ગામના તળાવમાં નવા નીર આવતા લોકોમાં ખુશી જોવા મળી હતી.