ગામ હોય તો આવું: સાબરકાંઠાના તખતગઢ કંપા ગામે ઘરે ઘરે પાણીના મીટર, કચરો ઉપાડવા માટે ઈ-રિક્ષા

ઈશાન પરમાર, સાબરકાંઠા: 'સ્વચ્છતા ત્યાં પ્રભુતા' ઉક્તિને સાર્થક કરતું એક ગામ સાંબરકાંઠા જિલ્લામાં આવેલું છે. સાબરકાંઠા જિલ્લાના એક ગામમાં પાણીજન્ય રોગ (Waterborne diseases) અને ગંદકી ન થાય તે માટે ઘરે ઘરે પાણીના મીટર (Water meter) લગાવવામાં આવ્યા છે. એટલું જ નહીં, ગામમાં સ્વચ્છતા રાખવા માટે પર્યાવરણને કોઈ નુકસાન ન થાય તે માટે પંચાયતે ડોર ટુ ડોર કચરો (Door to door waste collection) એકત્રિત કરવા માટે બે ઇ-રિક્ષા (Electric Rickshaw) પણ રાખ્યા છે.

દેશના વડાપ્રધાને સ્વચ્છતા અંગે જાગૃતિ લાવી છે. વડાપ્રધાન મોદીએ સમગ્ર દેશ સ્વચ્છ રહે તે માટે વિવિધ યોજનાઓ શરૂ કરી હતી. પ્રાંતિજ તાલુકાના નાનકડા ગામ તખતગઢ કંપા (Takhatgadh Kampa village)એ સ્વચ્છતાને પ્રભુતા માનીને ગામને સ્વચ્છ બનાવવાના પ્રયાસો છેલ્લા કેટલાય વર્ષોથી હાથ ધર્યાં છે.

તખતગઢ કંપામાં ગંદકી ન થાય અને પાણીનો બગાડ ન થાય તે માટે ઘરે ઘરે પાણીના મીટર લગાવવામાં આવ્યા છે. આ કારણે ગામમાં અને શેરીમાં ગંદકીનું પ્રમાણ ઘટી ગયું છે. બીજી તરફ પાણીજન્ય રોગો પણ અટક્યા છે. વધુમાં પાણીની પણ બચત થઈ રહી છે.

આ જ કારણે સરકારે ગામની નોંધ લઈને પશ્ચિમ ભારતની શ્રેષ્ઠ પંચાયતનો એવોર્ડ પણ એનાયત કર્યો છે. ગામ લોકો પ્લાસ્ટિક કે અન્ય કચરો ઘર આગળ નાખી દેતા હતા, આ કારણે સરપંચે જિલ્લા પંચાયતનો સંપર્ક કરીને ગામને સ્વચ્છ રાખવાની રજુઆત કરી હતી. જે બાદમાં ગામને બે રિક્ષા અર્પણ કરવામાં આવી હતી.

તખતગઢ કંપા ગામ પંચાયતને સાબરકાંઠા જિલ્લા પંચાયત તરફથી સ્વચ્છ ભારત મિશન ગ્રામીણ અંતર્ગત 15મા નાણાપંચની 10 ટકા ગ્રાન્ટમાંથી ડોર ટુ ડોર વેસ્ટ કલેક્શન કરવા માટે બે ઈ રિક્ષા આપવામાં આવી છે. રિક્ષાથી પ્રદૂષણ પણ અટકે છે અને ગામમાં સ્વચ્છતા પણ રહે છે.

જ્યારથી ગામમાં ઈ-રિક્ષા આવી છે ત્યારથી ગામના રસ્તાઓ પણ સુંદર લાગી રહ્યા છે. ગામ લોકો હાલ તો સ્વચ્છતાને લઈને ખુશ છે, કારણ કે ગામડું પણ શહેર સમોવડું થઈ ગયું છે. દરેક ઘરેથી કચરો એકત્રિત કરવા આવી રહ્યો છે, જેથી ગામમાં ગંદકીનું પ્રમાણ ઘટી ગયું છે.

એક સમયે પાણીની તાણ અનુભવતું ગામ આજે પાણીદાર બની ગયું છે. તો ગામમાં પાણીજન્ય રોગ કે ગંદકી પણ અટકી છે. સાથે જ આ ગામે અન્ય ગામડાઓને એક સંદેશ આપ્યો છે. આ સાથે જ ગામ લોકોએ ગામને સ્વચ્છ બનાવીને પીએમ મોદીના સંકલ્પને સાકાર કર્યો છે.

એક સમયે પાણીની તાણ અનુભવતું ગામ આજે પાણીદાર બની ગયું છે

ગામમાં દરેક ઘરેથી કચરો એકત્રિત કરવા આવી રહ્યો છે.