ગીરનાર પર જ યોજાતી આરોહણ-અવરોહણ સ્પર્ધા હવે ઈડરિયા ગઢ પર યોજાઈ, લોકોમાં અનેરો ઉત્સાહ

ઈશાન પરમાર, ઈડર: 'અમે ઈડરિયો ગઢ જીત્યા રે આનંદ ભયો...' ઈડરિયા ગઢ પર લાગેલી આ દોડ છે ઈડરિયો ગઢ જીતવા માટેની દોડ. હા, આજે ગુજરાત સરકારના રમત-ગમત અને યુવા સંસ્કૃતિક વિભાગ દ્વારા ઈડરિયા ગઢ પર ત્રીજીવાર આરોહણ-અવરોહણ સ્પર્ધાનું આયોજન કરવામાં આવેલું.

અત્યાર સુધી માત્ર ગીરનાર પર જ યોજાતી આ સ્પર્ધા આ વખતે ઇડરીયા ગઢ પર પણ યોજાઈ છે. આ સ્પર્ધામાં 279 સ્પર્ધકોએ ભાગ લીધો હતો. તેમાં 172 યુવક અને 107 યુવતીઓએ હોશ ભેર ભાગ લઇ ઈડરિયો ગઢ જીતવા દોડ લગાવી હતી

ઉલ્લેખનીય છે કે, અહીં આવેલા દરેક સ્પર્ધકોમાં પણ ખુશી જોવા મળી હતી. તો અહીંથી તેઓ નેશનલ કક્ષાએ અને ઈન્ટરનેશનલ કક્ષાએ પણ ભાગ લેવા જવાની ઈડર ગઢથી જ શરૂઆત કરવામાં આવી હતી.

ઈડરિયો ગઢ એક ઐતિહાસિક ધરોહર છે અને જેને જોવા માટે લોકો ઉમટી પડતા હોય છે ત્યારે અહીંની આ સ્પર્ધામાં દુર દુરથી આવીને લોકોએ ભાગ લીધો હતો. આ સાથે સાથે તેઓએ ગઢના ઈતિહાસની માહિતી પણ મેળવી હતી.

ગઢ પર યોજાયેલી આ સ્પર્ધામાં ગઢના 699 પગથીયા ઝડપથી ચડનાર 10 સ્પર્ધકો માટે અલગ અલગ ઇનામ પણ રાખવામાં આવ્યું. જો કે આવેલા સ્પર્ધકોમાં ઇનામ કરતા વધુ જીજ્ઞાસા ગઢને આંબવાની દેખાઈ રહી હતી.

આ સ્પર્ધામાં જીતેલો સ્પર્ધકોને પ્રાંત અધિકારીએ અભિનંદન પણ પાઠવ્યા હતા. આ સ્પર્ધા બાદ નેશનલ કક્ષાએ પણ ભાગ લેવા જવાની ઈચ્છાઓએ ઈડર સ્પર્ધા બાદ વ્યક્ત કરી હતી.

ઈડરિયા ગઢ પ્રત્યેનું આકર્ષણ માત્ર સાબરકાંઠાનાં જ લોકોમાં નહી પણ ગુજરાતના તમામ લોકોમાં જોવા મળે છે. ગઢ પર થઇ રહેલું ખનન બંધ થયા બાદ હવે ગુજરાતના લોકો ગઢ, તેના સ્થાપત્યો, તેનો ગૌરવવંતો ઈતિહાસ જાણી-માણી શકે એ માટે આ જે પ્રયાસ થયો તેને સ્થાનિક લોકો પણ આવકારી રહ્યા છે.