રાજકોટ: ગંભીર અકસ્માતમાં બે સગા ભાઈનાં મોત, દ્રશ્યો જોઈને મગજ ચકરાવે ચઢી જશે

રાજકોટ: રાજ્યમાં દરરોજ અકસ્માત (Accident)ની અનેક ઘટનાઓ બનતી હોય છે. 24 કલાકમાં સૌરાષ્ટ્ર અને ઉત્તર ગુજરાતમાં અકસ્માતના બે બનાવ (Road accidents)માં ત્રણ આશાસ્પદ યુવકોએ જીવ ગુમાવ્યા છે. ઉપલેટા (Upleta) નજીક થયેલા અકસ્માતમાં કારે બાઇકને પાછળથી ટક્કર મારી હતી. ટક્કર એટલી જોરદાર હતી કે કારના બોનેટના ભાગમાં બાઇક ફસાઈ ગયું હતું. આ બનાવમાં એક યુવકનું ઘટનાસ્થળે અને એક યુવકનું સારવાર દરમિયાન મૃત્યુ થયું હતું.

રાજકોટ જિલ્લાના ઉપલેટા નજીક ગંભીર અકસ્માત સર્જાતા બે યુવકોનાં મોત નીપજ્યા છે. અકસ્માતમાં એક યુવક ઈજાગ્રસ્ત થયો છે. મળતી માહિતી પ્રમાણે ઉપલેટા નજીક આવેલા વાડાસડા ગામની ચોકડી પાસે કારચાલકે મોટરસાઇકલમાં સવાર ત્રણ યુવકોને પાછળથી ટક્કર મારી હતી.

કારની ટક્કર એટલી જોરદાર હતી કે બાઇકમાં સવાર ત્રણ યુવકો પૈકી એક યુવક સામત ઉર્ફે ભોલો ધનજીભાઈ ચૌહાણનું ઘટનાસ્થળે જે મોત થયું હતું. બીજા એક યુવક મહેશ ઉર્ફે મનોજ ધનજીભાઈ ચૌહાણનું ઉપલેટા કોટેજ હોસ્પિટલ ખાતે સારવાર દરમિયાન મોત નીપજ્યું હતું.

મળતી માહિતી પ્રમાણે મૃતક બંને યુવકો જામજોધપુર તાલુકાના નાની ગોપ ગામના રહેવાશી છે. બંને મૃતક યુવકો સગા ભાઈ છે. અકસ્માતમાં ઘાયલ થયેલો ત્રીજો યુવક કુતિયાણા તાલુકાના તરસાઈ ગામનો નગીન લાલજીભાઈ ઉર્ફે લાલાભાઈ ઢાકેચા છે.

યુવકને ઉપલેટાની કોટેજ હૉસ્પિટલ ખાતે ખસેડવામાં આવ્યો હતો. હૉસ્પિટલ ખાતે મોટી સંખ્યામાં વાલ્મિકી સમાજના લોકો દોડી આવ્યા હતા. બનાવની જાણ થતાં પોલીસ પણ બનાવ સ્થળે દોડી ગઈ હતી અને બંને યુવકોના મૃતદેહોને પોસ્ટ મોર્ટમ માટે ખસેડ્યા હતા.

બીજા એક બનાવમાં બનાસકાંઠા જિલ્લામાં એક યુવકનું મૃત્યુ થયું છે. મળતી માહિતી પ્રમાણે બનાસકાંઠાના ધાનેરા નેનાવા હાઇવે પર હિટ એન્ડ રનની ઘટના બની છે. જેમાં ધાખા પાટિયા પાસે બાઈકને ટક્કર મારી અજાણ્યો વાહન ચાલક ફરાર થઈ ગયો હતો.

આ અકસ્માતમાં 32 વર્ષીય આશાસ્પદ યુવકનું ઘટનાસ્થળે જ મોત થયું હતું. અકસ્માતના સમાચાર બાદ ધાનેરા પોલીસ બનાવસ્થળે દોડી ગઈ હતી. પોલીસે મૃતક યુવકની લાશને પોસ્ટ મોર્ટમ માટે ખસેડી હતી.

રાજકોટ જિલ્લામાં થયેલા અકસ્માતમા બે સગા ભાઈનાં મોત.