રાજકોટ: મંગેતર સાથેની સફર બની અંતિમ સફર, અકસ્માતમાં મંગેતરની નજર સામે વાગ્દત્તાનું મોત

રાજકોટ: રાજકોટ શહેર (Rajkot city)માં એક અજીબો કિસ્સો સામે આવ્યો છે. આ કિસ્સામાં મંગેતર (Fiance)ની નજર સામે જ ભાવિ પત્ની એટલે કે તેની વાગ્દત્તા (Fiancee)નું મોત થયું છે. સગાઈ થઈ ગઈ હોવાથી યુવક અને યુવતી બાઇક પર સફર માટે નીકળ્યા હતા. આ દરમિયાન જ એક કાળમુખા ટ્રકે ટ્રાફિક સિગ્લન (Traffic signal) પર બાઇક પર સવાર આ યુગલને ટક્કર મારી હતી. અકસ્માતના આ બનાવમાં યુવતીનું નિધન થયું છે. જ્યારે યુવકને ઈજા પહોંચી છે. લગ્ન પહેલા જ યુગલ ખંડિત થતા બંનેના પરિવારમાં શોકની લાગણી પ્રસરી ગઈ છે. પરિવારનું કહેવું છે કે તેમની દીકરી દ્રષ્ટિ ખૂબ જ મળતાવડા સ્વભાવની હતી. આથી જ તે જ્યાં પણ જતી, ત્યાં લોકોને પોતાના બનાવી લેતી હતી. પોલીસે આ મામલે મૃતકની મંગેતરની ફરિયાદના આધારે ટ્રક ચાલક સામે ગુનો દાખલ કર્યો છે.

પ્રાપ્ત માહિતી અનુસાર 15મી ઓગસ્ટ રવિવારના રોજ રાત્રિના 9:30 વાગ્યા આસપાસ રૈયા ટેલિફોન એક્સચેન્જ પાસે એક બાઇકને ટ્રક ચાલકે ઠોકર મારી હતી. ગ્રીન સિગ્નલની રાહ જોઇ ઊભેલા બાઈક સવાર યુવક અને યુવતીને ઠોકર વાગતા યુવક અને યુવતીને ઇજા પહોંચી હતી.

પાછળથી ટક્કર મારવાને પગલે બાઈકના પાછળના ભાગમાં બેઠેલી દ્રષ્ટિ પરમાર રોડ પર ફંગોળાઇ હતી. તેમજ તેના પેટ ઉપરથી ટ્રકના વ્હીલ ફરી વળતાં તેણીને ગંભીર ઈજા પહોંચી હતી. જ્યારે કે તેના મંગેતર રાજને હાથ અને પગના ભાગે ઈજા પહોંચી હતી.

અકસ્માત બાદ દ્રષ્ટિને સારવાર માટે ખાનગી હૉસ્પિટલમાં ખસેડવામાં આવી હતી, પરંતુ કુદરતને જાણે કંઈક ઔર જ મંજૂર હોય તેમ સારવાર દરમિયાન દ્રષ્ટિનુ મૃત્યું નીપજ્યું હતું.

અકસ્માતનો બનાવ બનતા ટ્રક ચાલક ટ્રક રેઢો મૂકી ત્યાંથી નાસી છૂટ્યો હતો. તેમજ ઘટનાસ્થળે એકઠા થયેલા લોકોએ પોલીસને જાણ કરતાં ગાંધીગ્રામ પોલીસ મથકના પોલીસ ઇન્સ્પેક્ટર ખુમાનસિંહ વાળા સહિતનો સ્ટાફ ઘટનાસ્થળ પર પહોંચ્યો હતો.

ગાંધીગ્રામ પોલીસે મૃતક દ્રષ્ટિના મંગેતર રાજ વાઘેલાની ફરિયાદ પરથી ભાગી છૂટેલા ટ્રક ચાલક સામે ગુનો નોંધી આગળની તપાસ હાથ ધરી છે. પરિવારજનોના જણાવ્યા પ્રમાણે દ્રષ્ટિ બે બહેન અને એક ભાઈમાં મોટી હતી.

રાજ વાઘેલા નામના યુવક સાથે દોઢ વર્ષ પહેલાં તેની સગાઈ થઈ હતી. દ્રષ્ટિ ખૂબ જ હસમુખી અને મળતાવડા સ્વભાવની હોવાના કારણે તે જ્યાં જતી ત્યાં લોકોને પોતાના બનાવી લીધી હતી. બીજી તરફભાવિ પુત્રવધુનું મોત નિપજતા વાઘેલા પરિવાર શોકમાં ગરકાવ થઇ ચૂક્યો છે. પરમાર પરિવારને પણ પોતાની વ્હાલસોયી દીકરી ગુમાવવાનો વારો આવ્યો છે.