ભૂકંપના આંચકાથી ગોંડલના ગામમાં શાળાની છત ધરાશાયી, શિક્ષકો અને પ્રિન્સિપાલ બહાર દોડી ગયા

હરીન માત્રાવડિયા, રાજકોટ : સૌરાષ્ટ્ર (Saurashtra)માં આજે વહેલી સવારે ભૂકંપના આંચકા (Earthquake) અનુભવાયા હતા. ભૂકંપના ડરથી લોકો તાત્કાલિક ઘરની બહાર નીકળી ગયા હતા. ભૂકંપનું કેન્દ્રબિંદુ રાજકોટ (Rajkot)થી 22 કિલોમીટર દૂર નોંધાયું હતું. રાજકોટ સહીત આસપાસના વિસ્તારોમાં પણ ભૂકંપનો ભારે અનુભવ થયો હતો. ભૂકંપથી ખાસ કોઈ મોટી નુકસાનીના સમાચાર સામે નથી આવ્યા. જોકે, અનેક મકાનોમાં તિરાડો જોવા મળી હતી તો ગોંડલના કોલીથડ ગામ (Kolithad Village)માં એક સ્કૂલની છત ધરાશાયી થઇ છે.

આ ઘટનામાં કોઈને જાનહાની થઈ નથી. બીજી તરફ દાળીયામાં ભૂકંપના કારણે મકાનની દીવાલોમાં તીરોડો પડી ગઈ હતી. સવારે 7.41 વાગ્યાની આસપાસ લગભગ 3 થી 4 સેકન્ડ સુધી 4.8ની તીવ્રતાનો ભૂકંપનો આંચકો અનુભવાયો હતો. રાજકોટ જીલ્લાના ગોંડલ તાલુકામાં પણ વહેલી સવારે ભૂકંપના આંચકા અનુભવાયા હતા, જેમાં ગોંડલના કોલીથડ ગામની જી.બી.કોટક હાઈસ્કૂલની છત ધરાશાયી થઈ હતી.

સદનસીબે સ્કૂલ બંધ હોવાથી જાનહાની થઈ નથી. ભૂકંપનો આંચકો આવ્યો ત્યારે શાળાનો સ્ટાફ સ્કૂલમાં હાજર હતો. કોરોનાની મહામારી ચાલી રહી છે એટલે સ્કૂલમાં શિક્ષણકર્યા બંધ હોવાથી વિદ્યાર્થીઓ ન હતા.

ભૂકંપમાં શાળાના સ્ટોર રૂમ તરીકે ઉપયોગ કરતા રૂમની છત પડી હતી. જેમાં કોઈ પણ પ્રકારનું અન્ય નુકસાન નથી થયું. શાળામાં શિક્ષકો અને પ્રિન્સિપાલને ભૂકંપની ખબર પડતા તેઓ તાત્કાલિક બિલ્ડિંગ બહાર દોડી ગયા હતા.

શાળાની છતને થયેલું નુકસાન.

ગોંડલના કોલીથડ ખાતે આવેલી સ્કૂલ.