રાજકોટ : સર્વિસ રોડ પર સૂતેલા લોકોથી થોડુક છેટું રહી ગયું મોત, જુઓ અકસ્માતના લાઈવ CCTV 

અંકિત  પોપટ રાજકોટ: શહેરમાં વધુ એક વખત BRTS રૂટની રેલિંગ સાથે કાર ધડાકાભેર અથડાઈ હોવાનો બનાવ સામે આવ્યો છે. રાજકોટ શહેરમાં 150 ફૂટ રોડ પર રાત્રીના બે વાગ્યા આસપાસ વ્હાઈટ કલરની swift કાર પુરપાટ ઝડપે બીઆરટીએસ રૂટ ની રેલિંગ સાથે અથડાઈ હોવાનું સામે આવ્યું છે. જે સમગ્ર ઘટના સીસીટીવી ફુટેજમાં પણ પેદા થઇ ગઇ છે. જે સીસીટીવી ફૂટેજ હાલ સોશિયલ મીડિયામાં વાઇરલ થઇ રહ્યા છે. સીસીટીવી ફૂટેજમાં સ્પષ્ટ પણે જોઈ શકાય છે કે રોડની ડાબી બાજુ કેટલાક લોકો ફૂટપાથ પર સૂતેલા નજરે પડી રહ્યા છે.

ત્યારે ધડાકાભેર કાર અથડાવાના કારણે રસ્તા પર સૂતેલા લોકો પણ જાગી જાય છે જે ઘટના પણ સીસીટીવીમાં કેદ થઈ છે. જાણવા મળતી વિગત અનુસાર કારચાલક નશાની હાલતમાં કાર ચલાવતો હતો. જેના કારણે કારચાલકે સ્ટિયરિંગ પરથી કાબુ ગુમાવતા અકસ્માતની ઘટના ઘટી હોવાનું સામે આવ્યું છે.

સમગ્ર મામલે સ્થાનિક પોલીસ દ્વારા swift કાર ચાલક વિરુદ્ધ કોઈ શિક્ષાત્મક પગલાં લેવામાં આવે છે કે કેમ તે જોવું અતિ મહત્ત્વનું બની રહેશે. ઉલ્લેખનીય છે કે, ઓગસ્ટ 2021માં જાણીતા ઉદ્યોગપતિ અને સાયકલ ચલાવવાના શોખીન વિજય ભાઈ સોરઠીયા વહેલી સવારે સાઇકલ ચલાવી રહ્યા હતા. આ સમયે એક કાર ચાલકે તેમને હડફેટે લીધા હતા.

જેના કારણે વિજય ભાઈ સોરઠીયા નું ઘટનાસ્થળે જ મોત નીપજ્યું હતું. અકસ્માતની ઘટના બનતા કારચાલક ઘટનાસ્થળ પર કાર મૂકીને જ નાસી ગયો હતો. જે ઘટના પણ સીસીટીવીમાં કેદ થઈ હતી. જે સમયે આ બનાવ બન્યો હતો તે સમયે કાર ચાલક પાસે ford કંપનીની ઇકોસ્પોર્ટ કાર હોવાનું સામે આવ્યું હતું.

આમ, ઝડપની મજા અનેક વ્યક્તિઓ માટે મોતની સજા બનતી હોવાનું સામે આવ્યું છે. ત્યારે વાહન ચલાવનારા વાહનચાલકો નિર્ધારિત ગતિ મર્યાદા માં વાહન ચલાવે તે ખૂબ જ જરૂરી છે.