રાજકોટ : લૉકડાઉમાં તસ્કરો પાનની દુકાનમાંથી સોપારી, તમાકુ અને સિગારેટનો હાથફેરો કરી ગયા!

હરીન માત્રાવડિયા, રાજકોટ : હાલ કોરોના વાયરસ (Coronavirus)ને કારણે લૉકડાઉન (Lockdown)ચાલી રહ્યું છે. આ દરમિયાન રાજકોટ (Rajkot)ના મવડી વિસ્તારમાં ચોરી ની એક અજીબો ગરીબ ઘટના સામે આવી છે. શહેરના મવડી વિસ્તારમાં આવેલી એક પાનની દુકાન (Pan Masala Shop)માં કોઈ હાથફેરો કરી ગયું છે. લૉકડાઉનમાં લોકો દિવસે પણ કામ વગર ઘરની બહાર નથી નીકળી શકતા એવા સમયે રાત્રે એક પાનની દુકાનમાં તસ્કરો (Thief) ત્રાટક્યા હતા.

લૉકડાઉનમાં લોકોને પાન, મસાલા કે સિગારેટ મળથી નથી ત્યારે પાનની દુકાનમાં કોઈ રીઢા ચોર ચોરી કરી ગયા કે પછી કોઈ વ્યસનીનું આ કામ છે તે જોવાનું રહ્યું. કારણ કે અત્યારે લોકડાઉનમાં રાજકોટના તમામ પાન અને ગલ્લા બંધ છે. આથી બંધાણી (વ્યસની)ઓને માવા, તમાકુ કે સિગરેટ મળી રહ્યા નથી. આથી આવા કોઈ લોકોએ પણ પાનની દુકાનમાં હાથફેરો કર્યો હોવાની આશંકા છે.

મવડી વિસ્તારમાં પાનના ગલ્લામાં થયેલી ચોરી બાબતે દુકાન માલિકે પોલીસને જાણ કરી હતી. પોલીસ પણ હવે આસપાસના સીસીટીવી ફૂટેજના આધારે તપાસ કરી રહી છે. ચોરી કરનાર વ્યક્તિએ દુકાનમાં ચોરી કરવા માટે દુકાનનું શટર કે લોક તોડ્યું ન હતું પરંતુ પાનના ગલ્લાની બાજુમાં આવેલા ઝાડ પર ચઢીને દુકાનનું છાપરું બાજુમાં ખસેડી દુકાનમાં પ્રવેશ કર્યો હતો.

જે બાદમાં દુકાનમાં રહેલી સિગારેટ, સોપારી તેમજ તમાકુની ચોરી કરી હતી. પાનના ગલ્લામાં ચોરીની વાત હાલ રાજકોટમાં ચર્ચાનો વિષય બની છે.