રાજકોટ : દારૂની હેરાફેરીનો ગજબ આઇડિયા! ઈડલી-સાંભાર અને શાકભાજી વેચનારા બન્યા બૂટલેગર

અંકિત પોપટ, રાજકોટ : કોરોનાના (Coronavirus) કારણે અનેક લોકોના વેપાર-ધંધા ભાંગી પડ્યા છે અનેક લોકોને પોતાની નોકરી ગુમાવવાનો વારો આવ્યો છે. ત્યારે કોરોનાના કારણે અનેક લોકો ગુનાહિત કૃત્ય ના રવાડે પણ ચડ્યા હોવાનું સામે આવતું રહ્યું છે.  ત્યારે રાજકોટ સ્પેશિયલ ઓપરેશન ગ્રુપ (SOG) દ્વારા રાજકોટ મોરબી હાઇવે પર આવેલી મારવાડી કોલેજ ની સામેથી વિદેશી દારૂની કુલ (Liquor caught) 101 પેટી સાથે 2 આરોપીઓની ધરપકડ કરવામાં આવી છે.

ન્યૂઝ 18 ગુજરાતી સાથેની વાતચીતમાં સ્પેશિયલ ઓપરેશન ગ્રુપના પોલીસ ઇન્સ્પેક્ટર રોહિત રાવલે જણાવ્યું હતું કે, પીએસઆઇ અસલમ અન્સારી અને તેમની ટીમના માણસોને બાતમી મળી હતી કે, મારવાડી કોલેજ પાસેથી દારૂ ભરેલી એક બોલેરો કાર પસાર થવાની છે. જે આ બાબતની મળેલી ચોક્કસ બાતમીના આધારે સ્પેશિયલ ઓપરેશન ગ્રૂપની બે જેટલી ટુકડીઓ બે જુદી જુદી ખાનગી કારમાં વોચમાં હતી.

આ સમયે બોલેરો કાર ત્યાંથી પસાર થતા તેને કોર્ડન કરીને તેને રોકી ચેક કરતા ડુંગળીની આડમાં ભારતીય બનાવટની અલગ અલગ બ્રાન્ડની સીલપેક ઈંગ્લીશ દારૂની બોટલ નંગ 1212 જેટલી મળી આવી હતી જેની અંદાજિત કિંમત 4,24,200રૂપિયા જેટલી થાય છે.

સ્પેશિયલ ઓપરેશન ગ્રુપ દ્વારા ઝડપી પાડવામાં આવેલા બંને શખ્સોની પુછપરછ કરતા એક વ્યક્તિએ પોતાનું નામ બાલકૃષ્ણ મદ્રાસી હોવાનું જણાવ્યું હતું તો સાથે જ પોતે રેલવે સ્ટેશન પાસે આવેલા ઓફિસની બાજુમાં રહેતો હોવાનું જણાવ્યું હતું. જ્યારે કે અન્ય આરોપીએ પોતાનું નામ મનીષ મનોજભાઈ જાખેલીયા હોવાનું જણાવ્યું હતું. તો સાથે જ પોતે શાકભાજી વેચવાનો ધંધો કરતો હોવાનું જણાવ્યું હતું.

સ્પેશિયલ ઓપરેશન ગ્રુપની ટીમે દ્વારા ઈંગ્લીશ દારૂની બોટલો બોલેરો વાહન તેમજ મોબાઇલ ફોન સહિત કુલ સાત લાખ 25 હજાર 200 રૂપિયાનો મુદ્દામાલ કબજે કર્યો છે. ઉલ્લેખનીય છે કે આ અગાઉ પણ રાજકોટ શહેર પોલીસ દ્વારા જુદી જુદી રીતે છુપાવીને લાવવામાં આવેલ દારૂ ઝડપી પાડવામાં આવ્યો છે.