રાજકોટ: આંતરરાજ્ય ચોરી કરતી ગેંગના બે સભ્યોની ધરપકડ, કર્યા અનેક ખુલાસા

અંકિત પોપટ, રાજકોટ : છેલ્લા કેટલાય સમયથી રાજકોટ શહેર તેમજ રાજકોટ જિલ્લામાં ઘરફોડ ચોરીના બનાવો સામે આવી રહ્યા છે. ત્યારે રાજકોટ ક્રાઇમ બ્રાન્ચ દ્વારા આંતરરાજ્ય ચોરી કરતી ગેંગના અન્ય સભ્યોની ધરપકડ કરવામાં આવી છે.

તાજેતરમાં રાજકોટ ના આજીડેમ પોલીસ સ્ટેશન વિસ્તારમાં ઘરફોડ ચોરીનો બનાવ સામે આવ્યો હતો જે બાબતે રાજકોટ શહેર પોલીસ કમિશનર મનોજ અગ્રવાલ દ્વારા ગુનાને ઉકેલવા માટે જુદી જુદી ટીમોની રચના કરવામાં આવી હતી જે બાબતે રાજકોટ ક્રાઇમ બ્રાન્ચની ટીમે તપાસ કરતા બારમ સિંગ પંચાલ અને કાલું ઉર્ફે કાલિયાની ધરપકડ કરી છે.

બંને પાસેથી આજી ડેમ વિસ્તારમાં કરવામાં આવેલ ચોરીનો મુદ્દામાલ કબજે કરવામાં આવ્યો છે તો સાથે જ પૂછપરછમાં બન્નેએ જણાવ્યું છે કે તેઓએ રાજકોટ શહેર જિલ્લા તેમજ જામનગર જિલ્લાની અંદર કુલ ૧૨ જેટલી ચોરીના ગુનાઓને અંજામ આપ્યો છે

એસીપી રાઠોડના જણાવ્યા પ્રમાણે આંતરરાજ્ય ચોરી કરતી ગેંગ માં કુલ પાંચ જેટલા સભ્યો હતા. જે પૈકી એક સભ્ય નું મરણ નિપજ્યું છે.  ત્યારે રાજકોટ ક્રાઇમ બ્રાન્ચ દ્વારા બે સભ્યોની ધરપકડ કરવામાં આવી છે. ત્યારે હજુ પણ બે આરોપીઓની ધરપકડ કરવાની બાકી છે તે મામલે હાલ શોધખોળ શરૂ છે. રાજકોટ ક્રાઇમ બ્રાંચે પકડી પાડેલ બે આરોપી પૈકી એક આરોપી બારમસિંગ મધ્યપ્રદેશ ઈંદોરના તેજાજી નગર પોલીસ સ્ટેશનના ૧૩ જેટલા ગુનાઓમાં નાસતો ફરતો હતો

ઉલ્લેખનીય છે કે જે રીતે રાજકોટ શહેરમાં દિવસેને દિવસે ગુનાખોરીનો ગ્રાફ વધી રહ્યો છે. તો બીજી તરફ પોલીસે પણ ગુનેગારોને જેલના સળિયા સુધી પહોંચાડવાની કામગીરી શરૂ કરી છે.