રાજકોટ: રસ્તાની વચ્ચે જીતની ઉજવણી કરતા કોંગી કાર્યકર્તાઓને ટીંગાટોળી કરીને વાનમાં બેસાડ્યા

લોકસભા ચૂંટણીની સેમી ફાઇનલ ગણાતી પાંચ રાજ્યોની વિધાનસભા ચૂંટણીનું આજે પરિણામ સાંજ સીધુમાં સ્પષ્ટ થઇ જશે. સવારથી મત ગણતરી થઇ રહી છે જેમાં કોંગ્રેસની બહુમતી રાજસ્થાન અને છત્તીસગઢમાં સ્પષ્ટ થઇ ગઇ છે અને મધ્ય પ્રદેશમાં પણ ભાજપ કોંગ્રેસ લગોલગ ચાલી રહ્યાં છે. ત્યારે આખા દેશમાં કોંગ્રેસનાં કાર્યકર્તાઓ ઉત્સાહમાં આવી ગયા છે.

રાજકોટમાં પણ કાંગ્રેસનાં કાર્યકર્તાઓ ઉત્સાહમાં આવીને ત્રિકોણ બાગ ચોકમાં વચ્ચોવચ ફટાકડા ફોડીને ઉજવણી કરી રહ્યાં હતાં. જેના કારણે રાહદારીઓ અને વાહન ચાલકોને ટ્રાફિક જામની સમસ્યાનો ભોગ બનવો પડ્યું હતું.

ત્રિકોણ બાગ ચોકમાં વાહનોનો ટ્રફિક જામ કરી ફટાકડા ફોડતા પોલીસે 10થી વધારે કોંગ્રેસનાં કાર્યકર્તાઓની અટકાયત કરી છે. પોલીસ સ્થળ પર પહોંચી ત્યારે પણ કોંગ્રેસ પોતાનાં ઉત્સાહમાં ભંગ પાડવા માંગતા ન હતા જેના કારણે પોલીસે કાર્યકર્તાઓને ટીંગાટોળી કરીને પોલીસ વાનમાં બેસાડી દીધા હતાં.

રાજકોટમાં અનેક જગ્યાએ કાર્યકર્તાઓએ ઉજવણી કરતા એકબીજાને મીઠાઇ ખવડાવી, બેન્ડબાજા વગાડ્યા અને ફટાકડા પણ ફોડ્યા હતાં.

આખા રાજ્યમાં કોંગી કાર્યકર્તાઓએ ઉત્સાહથી ઉજવણી કરી હતી જ્યારે બીજી બાજુ બીજેપીનાં કાર્યાલયોમાં કાગડા ઉડતા હતાં.