સૌરાષ્ટ્રનો બીજો સૌથી મોટો ડેમ ઓવરફ્લો થવાની અણીએ, 22 ગામોને કરાયા અલર્ટ

મુનાફ બકાલી, જેતપુર સૌરાષ્ટ્રમાં (Saurashtra Rains) મોટી સિંચાઈ યોજનાઓ પૈકીનો બીજા નંબરનો મોટો ડેમ ભાદર-1 (Bhadar-1 Dam Water Level) ભાદરવામાં ઓવરફ્લો થવાની અણીએ છે. હાલમાં ભાદર-1 98 ટકા ભરાઈ જતા ભાદરવામાં ભાદરના પાણી હિલોળે ચઢ્યા છે. ડેમ ઓવરફ્લો થવાની અણીએ છે ત્યારે કુલ 22 ગામોને અલર્ટ કરવામાં આવ્યા છે. રાજ્યમાં વરસાદની ધમાકેદાર ઇનિંગ વચ્ચે લગભગ અનેક જળાશયો ભરાઈ રહ્યા છે ત્યારે ભાદર ઓવરફ્લો થવાથી અનેક ગામોમાં સિંચાઈની સમસ્યા દૂર થશે.

ભાદર-1 ડેમની સપાટી (Bhadar-1 Dam Water Level) 33.70 ફૂટે પહોંચી છે જેના પગલે ડેમ ઑવરફ્લો થવામાં 0.30 ફૂટ બાકી છે. ડેમમાં હાલમાં કુલ 1622 ક્યુસેક પાણીની આવક છે. ભાદરની કુલ સપાટી 34 ફૂટ છે.

ભાદર-1 ડેમ ઓવરફ્લો થતા ડેમના નીચાણ વાળા વિસ્તારોમાં આવતા 22 ગામોને અલર્ટ કરવામાં આવ્યા છે અને નદીના પટમાં અવરજવર ન કરવા સૂચના આપવામાં આવી છે. અગાઉ ભાદર 1 જ્યારે 80 ટકા ભરાયો હતો ત્યારે ડ્રોનથી દૃશ્યો લેવામાં આવ્યા હતા.

ભાદરના પાણી છોડવામાં આવે ત્યારે અલર્ટ થતા ગામોની યાદીમાં ગોંડલ તાલુકાના લીલાખા, મસીતાળા, ભંડારિયા, ખંભાલિડા, નવાગામ. જેતપુર ના મોણપર, ખીરસરા, દેરડી જેતપુર, નવાગઢ, રબારીકા, સરધારપુર, પાંચપીપળા, કેરાળી, લુણાગરા, લુણાગરી, વાડસડાનો સમાવેશ થાય છે.

જ્યારે જામકંડોરણાના તરાવડા, ઇશ્વરીયા, ધોરાજી ના વેગડી, ભૂખી, ઉમરકોટ, સહિત ના ગામોનો પણ ભાદર-1ના પાણીના નીચાણવાળા વિસ્તારોમાં સમાવેશ થાય છે. ભાદર-1 ડેમની જળસપાટીમાં સતત વધારો થતા ડેમ ગમે ત્યારે ઓવરફ્લો થઈ શકે છે. આમ સૌરાષ્ટ્રના ખેડૂતો માટે ખાસ કરીને રાજકોટ જિલ્લાના ખેડૂતો માટે આ સારા સમાચાર છે.