પોરબંદરઃ મોડી રાત્રે પેટ્રોલપંપ પર તોડફોડ, સીસીટીવીમાં કેદ થઈ ઘટના

ન્યૂઝ18 ગુજરાતીઃ પેટ્રોલપંપોને અવારનવાર નિશાન બનાવવામાં આવતા હોય છે. ખાસ કરીને મોડી રાત્રે પેટ્રોલપંપને ટાર્ગેટ કરીને ચોરી કરવામાં આવતી હોય છે. પોરબંદર ખાતે આવેલા એક પેટ્રોલપંપને મોડીરાત્રે નિશાન બનાવીને તોડફોડ કરવામાં આવી હતી. પોરબંદરના એમજી રોડ પર આવેલા ફ્રેન્ડ્સ પેટ્રોલપંપ ખાતે આ તોડફોડ કરવામાં આવી હતી.

મોડી રાત્રે ત્રણ જેટલા શખ્સો કારમાં સવાર થઈને આવ્યા હતા અને પેટ્રોલ પંપ ખાતે તોડફોડ કરી હતી. આ આખો બનાવ પેટ્રોલપંપ પર લગાવવામાં આવેલા સીસીટીવીમાં કેદ થઈ ગયો હતો.

મોડી રાત્રે 2:15 વાગ્યે આ બનાવ બન્યો હતો. સીસીટીવીમાં જોઈ શકાય છે કે ત્રણ શખ્સો એક કારમાં આવે છે અને પેટ્રોલપંપ પર તોડફોડ કરે છે.

પોલીસે આ મામલે ગુનો નોંધીને તપાસ હાથ ધરી છે. શા માટે પેટ્રોલપંપને નિશાન બનાવવામાં આવ્યો હતો તેની માહિતી મળી શકી નથી.

આવારા તત્વોએ પેટ્રોલ પંપના મશીન, ફર્નિચર, ખુરશીઓમાં તોડફોડ કરી હતી. સામે આવેલા સીસીટીવીમાં જોઈ શકાય છે કે ત્રણ વ્યક્તિઓ આવીને ગાડીને પાર્ક કરે છે. બાદમાં ગાડીની પાર્કિંગ લાઇટ ચાલુ કરીને ત્યાં તોડફોડ શરૂ કરવા લાગે છે.

તોડફોડનો બનાવ બન્યો હતો ત્યારે પેટ્રોલ પંપ બંધ હતો. એટલું જ નહીં પેટ્રોલ પંપની લાઈટો બંધ હતી.