‘એ હાલો માનવીયું ને મેળે...’ માધવપુરમાં ભગવાન કૃષ્ણ-રુક્મણીના લગ્ન થયા'તા

ગુજરાતમાં ત્રીજા નંબરનું સ્થાન ધરાવતો માધવપુર (ઘેડ)નો ઐતિહાસિક લોકમેળો શ્રીકૃષ્ણ અને રૂકમણીજીની લગ્નપ્રસંગની ઝાંખી કરાવે છે. ચૈત્ર મહિ‌નાની રામનવમીથી તેરસ સુધી પાંચ દિવસનો યોજાતો આ ભાતીગળ લોકમેળો અનોખી ભાત પાડે છે.

આ મેળામાં ઉત્તર-પૂર્વીય આઠ રાજ્યોના લોકો ભાગ લે છે. આ મેળો અરૂણાચલ પ્રદેશની 'મીશમી જનજાતી'ના લોકોને ગુજરાત સાથે જોડે છે. માધવપુર ભગવાન શ્રીકૃષ્ણ સાથે જોડાયેલું ઐતિહાસિક સ્થળ છે. શ્રીકૃષ્ણ-રૂકમણીના પવિત્ર લગ્ન બંધનનું સાક્ષી રહેલા આ સ્થળે આવતા યાત્રિકો ધન્યતા અનુભવતા હોય છે.

શ્રીકૃષ્ણની યાત્રા અને એમના જીવનમાંથી એક ભારતની પ્રેરણા મળે છે. તેમની પ્રેરણા માધવપુરના માંડવે અનુભવાય છે. રૂકમણી સાથે કૃષ્ણનો મિલાપ પશ્રિમ અને ઉત્તર-પૂર્વના રાજ્યોને જોડવાનો અનેરો પ્રસંગ છે.

ભગવાનના વિવાહની સાક્ષી બનેલા આ ઐતિહાસિક સ્થળ પર ચૈત્ર સુદ નવમીએ એટલે કે 30 માર્ચે મંડપ રોપણથી ઉત્સવ શરૂ થયો. બાદમાં ત્રણ દિવસ ભગવાનનું ફૂલેકું નગરમાં ફરે છે જેમાં લાખો શ્રદ્ધાળુઓ જોડાય છે.

માધવરાયજી મંદિર અને માધવપુરની ગલીએ ગલીએ કૃષ્ણ વિવાહ ગીતો ગૂંજી ઉઠે છે. ભગવાનના વિવાહ નિહાળવા માટે ગામે ગામથી અને બીજા રાજ્યોમાંથી લોકો આવે છે. 5 હજાર વર્ષ પહેલાં આ નગર ભગવાનના વિવાહનું સાક્ષી બન્યું હતું ત્યારથી અહીં દરવર્ષે આ ઉત્સવ ઉજવવામાં આવે છે.

ત્યારે આધ્યાત્મની સાથેઆ મેળામાં અવનવા રંગ પણ જોવા મળે છે. તેમાંય મેળાની રંગત તો 7 વાગ્યા પછી બરોબર જામે છે. જેમ જેમ અંધારુ થતું જાય તેમ તેમ રાતની રોશનીએ આસ્થા સાથે ઉત્સવમાં ચાર ચાંદ લગાવી દીધાં.