મધદરિયે ગુજરાત ATSએ આંતરી લેતા માફિયાઓએ ડ્રગ્સ ભરેલી બોટ ઉડાવી

પોરબંદર નજીક મધદરિયે ગુજરાત એટીએસ (એન્ટી ટેરરિસ્ટ સ્ક્વોડ) અને ડ્રગ્સ માફિયા વચ્ચે અથડામણ થઈ હતી. સામાન્ય રીતે માફિયાઓ સમુદ્રના માર્ગે જે તે દેશ કે રાજ્યમાં ડ્રગ્સ ઘૂસાડતા હોય છે. મધદરિયે થયેલી અથડામણ બાદ પોલીસે નવ જેટલા માફિયાઓની ધરપકડ કરી લીધી છે. જોકે, દરમિયાન માફિયાઓએ પુરાવાનો નાશ કરવા માટે પોતાની બોટને ઉડાવી દીધી હતી. ATS તરફથી આ દરમિયાન 100 કિલો હેરોઈન જપ્ત કરવામાં આવ્યું છે. ચૂંટણી પહેલા જ દેશમાં ડ્રગ્સ ઘૂસાડવાનું કાવતરું નિષ્ફળ બનતા મરીન પોલીસ અને કોસ્ટગાર્ડને પણ એલર્ટ કરવામાં આવી છે.

ડ્રગ્સ માફિયાઓએ બોટ ઉડાવી : મળતી માહિતી પ્રમાણે ડ્રગ્સ માફિયા રૂ. 500 કરોડના ડ્રગ્સ સાથે બોટમાં સવાર હતા. અથડામણ દરમિયાન ડ્રગ્સ હાથમાં ન આવે તે માટે માફિયાઓએ પોતાની બોટને ઉડાવી દીધી હતી. ગુજરાતી એટીએસ અને ઇન્ડિયા કોસ્ટગાર્ડની ટ્રેપમાં ફસાયા બાદ પુરાવાનો નાશ કરવા માટે માફિયાઓએ બોટને ઉડાવી દીધી હતી.

આ દરમિયાન ગુજરાત એટીએસએ જીવને જોખમમાં મૂકીને નવ જેટલા ઈરાની નાગરિકની ધરપકડ કરી છે. આ ડ્રગ્સ પાકિસ્તાનના બલુચિસ્તાન સ્થિત ગ્વાદર પોર્ટમાંથી બોટમાં ચડાવવામાં આવ્યું હતું.

પાકિસ્તાનના હામિદ મલિકે આ કન્સાઇનમેન્ટ મોકલ્યું હતું. આ ડ્રગ્સ લઈને નવ જેટલા ઈરાનના નાગરિકો સવાર હતા. આ કન્સાઇનમેન્ટ ભારતમાં જે વ્યક્તિ મેળવવાનો હતો તેની પણ માહિતી સામે આવી છે. એટીએસ તરફથી બહુ ઝડપથી આ વાતનો ખુલાસો કરવામાં આવશે.

ઓપરેશન દરમિયાન 100 કિલો હેરોઈન જપ્ત કરાયું છે.

પુરાવાના નાશ માટે માફિયાઓએ બોટને સળગાવી દીધી હતી.