Porbandar : માર્કેટમાં આવી ગઇ બરડા ડુંગરની કેસર કેરી, ફોટા જોઇને જ મોંઢામાં પાણી આવી જશે

Gayatri Chauhan, Porbandar : કેસર કેરી સૌ કોઈને પ્રિય હોય છે. ઉનાળો શરૂ થતાં જ બજારમાં કેસર કેરીની આવક શરૂ થઈ જાય છે. સામાન્ય રીતે માર્ચ મહિનામાં કેસર કેરીની આવકનો પ્રારંભ થઈ જાય છે. તાલાળા પંથકમાં જે રીતે કેસર કેરીનું ઉત્પાદન થાય છે એ રીતે પોરબંદરનાં બરડામાં પણ કેસર કેરીનું સારૂ એવું ઉત્પાદન જોવા મળે છે.

 બરડા ડુંગરની ગોદમાં આવેલા બિલેશ્વર, ખંભાળા, હનુમાનગઢ, આદિત્યાણા, કાટવાણા સહિતનાં ગામોમાં આંબાનાં બગીચા આવેલા છે. હાલ પોરબંદરનાં માર્કેટીંગ યાર્ડમાં કેસર કેરીની આવક શરૂ થઈ ગઈ છે. નિયમિત 80 થી 100 જેટલા બોક્ષની આવક થઇ રહી છે. હાલ ભાવ 1400 થી 1800  રૂપિયા ખેડૂતોને મળી રહ્યાં છે.

પોરબંદરનાં બરડા ડુંગરની ગોદમાં આવેલા ગામોમાં આંબાનાં બગીચા આવેલા છે. બરડાની કેસર કેરીનું ફળ મોટુ અને રસદાર હોય છે. જેને કારણે ગીરની કેસર કેરી કરતા બરડા પંથકની કેસર કેરીનો ભાવ પણ ઉંચો જોવા મળે છે. જેને કારણે ખેડુતોને આર્થિક ફાયદો પણ થાય છે.

કાઠીયાવાડી ખાવાનાં શોખીન હોય છે તેમાં કેરીની સિઝનનો પ્રારંભ થતાં જ નિયમિત કેરીનો સ્વાદ માણે છે. હાલ પોરબંદરમાં માત્ર બરડાની કેસર કેરીની આવક જોવા મળી રહી છે.

તેનો બોક્ષનો ભાવ રૂપિયા 1400 થી રૂપિયા 1800 જેવો જાેવા મળી રહ્યો છે જયારે પાકી કેરીનો ભાવ કિલોનો રૂપિયા 250 થી રૂપિયા 300 જેવો છે છતાં લોકો કેરીની ખરીદી કરે છે.

સામાન્ય રીતે ખેડૂતો ચોમાસું, રવિ પાક અને ઉનાળુ પાક લેતાં હોય છે અને ખેડુતો આધુનિક ખેતી તરફ વળ્યા છે.

પોરબંદર જિલ્લાની વાત કરીએ તો હનુમાનગઢ, ખંભાળા, બિલેશ્વર, આદિત્યાણા અને કાટવાણા સહિતનાં ગામોનાં ખેડુતો અન્ય પાકો લેવાને બદલે આંબાનાં બગીચા તરફ વળ્યા છે. અનેક ખેડૂતોએ આંબાનું વાવેતર કર્યું છે.