પંચમહાલ : શહેરાના નાડા ગામની શાળામાં યુવક-યુવતીએ ફાંસો ખાધો, 2 વર્ષમાં શાળામાં આપઘાતની બીજી ઘટના

રાજેશ જોષી, પંચમહાલ : પ્રેમમાં સમાજ પ્રેમ સંબંધોને (Love) ન સ્વીકારે ત્યારે આત્મહત્યાની ઘટનાઓ ઘટી જતી હોય છે. જોશમાં હોશ ગુમાવીને યુવક યુવતીઓ પોતાના પરિવાર સમાજની પરવાહ કર્યા વિના જિંદગી હોમી દેતા હોય છે ત્યારે આવી જ એક ઘટના પંચમહાલ (Panchmahal) જિલ્લાના નાડા (Nada) ગામે ઘટી છે. શહેરા તાલુકાના (Shahera) નાડા ગામની શાળામાં આજે બે પ્રેમી પંખીડાના (Lovers) આપઘાત (Suicide) કરેલી હાલતમાં મૃતદેહ મળી આવ્યા હતા.

ઘટનાની જાણ થતા જ ગ્રામજનો સાથે પોલીસનો કાફલો પહોંચી ગયો હતો. શાળામાં આવેલા પ્રથમ માળે દાદરાની નજીક યુવક અને યુવતીએ સજોડે ફાંસો ખાઈને જિંદગી ટૂંકાવી નાખી હતી. મૃતક યુવત યુવતીની ઓળખ થઈ જતા બંને એક જ ગામના હોવાનું સામે આવ્યું હતું.

જોકે, સૌથી આશ્ચર્ય ચકિત કરતી બાબત તો એ હતી કે આ જ શાળાના પરિસરમાં અગાઉ પણ એક પ્રેમી પંખીડાએ આપઘાત કરી લીધો હતો. વર્ષ 2019માં આ જ શાળામાં આપઘાત થતા ફરી એકવાર નાડા ગામે આત્મહત્યાની ઘટના ઘટી છે.

<br /> પ્રાથમિક અહેવાલો મુજબ યુવક અને યુવતી બંને જુદા જુદા સમાજના હતા અને પ્રેમ પ્રકરણમાં જ આપઘાત કર્યો છે. પોતાના પ્રેમને સમાજ નહીં સ્વીકારે તેવી બીકે આત્મહત્યા કરી લીધી હોવાની ચર્ચા છે ત્યારે વધુ બે પરિવારોએ પોતાના સંતાનો ગુમાવ્યા છે.

નાડા ગામની આ ઘટનામાં પોલીસે બંને યુવક-યુવતીના મૃતદેહને પોસ્ટમોર્ટમ માટે મોકલ્યા છે તેમજ ટેકનિકલ તપાસ પણ શરૂ કરી છે ત્યારે તપાસના અંતે આપઘાતની વધુ માહિતી સામે આવે તેવી શક્યતા છે. હાલતો સમગ્ર શહેરામાં આ ઘટના વાયુ વેગે પ્રસરી જતા ચકચાર મચી જવા પામી છે.