હિંમતનગર- શામળાજી હાઇવે પર સ્કોર્પિઓ પિલ્લર સાથે ધડાકાભેર અથડાઇ, ત્રણના મોત

સાબરકાંઠા : હિંમતનગર - શામળાજી હાઇવે પર ગંભોઇ પાસે બુધવારે રાતે 10 વાગ્યાની આસપાસ ગમખ્વાર અકસ્માત સર્જાયો છે. જેમા સ્કોર્પિયો જીપ ( કાર નંબર - જીજે-27-એપી-4486 ) રોડની બાજુના પિલ્લર સાથે અથડાઇને પલટી ખાઇ જતા અકસ્માત સર્જાયો હતો. જેમાં ત્રણ લોકોના મોત નીપજ્યા છે જ્યારે અન્ય ત્રણ લોકો ઘાયલ છે. તમામ ઇજાગ્રસ્તોને તાત્કાલિક હિંમતનગર સિવિલ હૉસ્પિટલમાં ખસેડવામાં આવ્યા છે.

આ અકસ્માતની જાણ થતા ગાંભોઈ પોલીસ પણ તાત્કાલિક ઘટના સ્થળે દોડી આવી હતી. આ સાથે ત્રણ ઇજાગ્રસ્તોને 108મા હિંમતનગર સિવિલમાં ખસેડયા હતા. જ્યારે ત્રણ મૃતકોની લાશ ગાંભોઈ સામુહિક આરોગ્ય કેન્દ્રમાં ખસેડી મૃતકોના પરિવારજનોને જાણ કરી હતી.

મળતી પ્રાથમિક માહિતી પ્રમાણે, આ તમામ લોકો અમદાવાદના અમરાઇવાડીના રહીશો છે. આ કારના ડેશબોર્ડ પર પોલીસ લખેલી પ્લેટ પણ લગાડેલી હતી.

મૃતકોના નામ કમલેશ ભૂસર, ધર્મેન્દ્ર વર્મા અને પપ્પુ મામા હોવાનું પ્રાથમિક તબક્કે જાણવા મળી રહ્યું છે.

આ અકસ્માતને પગલે થોડા સમય માટે ટ્રાફિકજામ થયો હતો. પરંતુ ક્રેઇનથી ગાડી ખસેડ્યા બાદ ટ્રાફિક સામાન્ય બન્યો હતો.

મૃતકોના પરિવારજનોને જાણ થતા તે લોકોમાં શોકનું મોજુ ફરી વળ્યું હતું.