હિંમતનગર: શું તંત્ર કોઈ મોટી જાનહાનિની રાહ જોઈ રહ્યું છે? આ રીતે ખાડાઓમાં ગરક થઈ રહ્યા છે વાહનો

ઈશાન પરમાર, સાબરકાંઠા: સાબરકાંઠા જિલ્લામાંથી પસાર થતા અમદાવાદ-ઉદેપુર હાઈવે (Ahmedabad-Udaipur highway)નું નવીનીકરણ કરી તેને સિક્સ લેન (Six lane)માં પરિવર્તિત કરવામાં આવી રહ્યો છે. જોકે, મંદ ગતિ અને આડેધડ કામ ચાલતું હોવાથી વાહનચાલકો પરેશાન થયા છે. વેપારીઓ પણ ત્રાહિમામ પોકારી ઉઠ્યા છે. અમદાવાદ-ઉદેપુર નેશનલ હાઈવે નંબર-8 (National highway No-8) પર હાલમાં સિક્સ લેનની કામગીરી ચાલી રહી છે. આ કામગીરી ગોકળગતિએ ચાલતા લોકો ત્રાહિમામ પોકારી ઉઠ્યા છે. હાઈવેની બાજુમાં ખાડા કરી દેવાતા વરસાદી પાણી ત્યાં ભરાઈ જાય છે. જેના પગલે અજાણ્યા વાહન ચાલકો અકસ્માતનો ભોગ બને છે. આખે આખી કાર આ ખાડાઓમાં ગરક થઈ રહી છે.

હિંમતનગરમાં ફક્ત 2 ઈંચ જેટલા વરસાદમાં તો જાણે કે તળાવ બની ગયું હોય તેવી પરિસ્થિતિનું નિર્માણ થયું છે. આ વિસ્તારની વાત કરીએ તો દર એક કલાકે એક વાહન, બાઈક કે ચાલીની જતી વ્યક્તિ અકસ્માતનો ભોગ બની રહ્યા છે. તેનાથી વાહનોને પણ નુકસાનન થઈ રહ્યુ છે. છેલ્લા બે દિવસમાં 10 વધુ વાહનો આ જ જગ્યાએ ખાબક્યા છે. જેના પગલે વાહનો તેમજ વાહન ચાલકને પણ ઈજા પહોંચી છે.

હાલ હાઈવેના સિક્સ લેનનું કામ ચાલી રહ્યુ છે. થોડા દીવસો અગાઉ જ અહીં હાઈવેના પાણી નિકાલની ગટર છે, તે તોડી નાખી અંદરથી લોખંડના સળિયા પણ કાઢી નંખાયા હતા. અહીંથી પથ્થરો પણ લઈ જવાયા હતા.

જોકે, તંત્ર ગટર પૂરવાનું જ ભૂલી ગયું છે. આ ભૂલનો ભોગ દરરોજ નિર્દોષ વાહન ચાલકો બની રહ્યા છે. બાઈક હોય, મોપેડ હોય, કે કાર હોય તમામ લોકો હાલ તો તંત્રના પાપની સજા ભોગવી રહ્યા છે. છેલ્લા બે દિવસથી સતત રજુઆતો કરવા છતા પણ તંત્રના પેટનું પાણી પણ હલતું નથી.

જો તંત્ર દ્રારા અહીં બેરીકેટ મૂકે અથવા પુરાણ કરે કે પાણીના નિકાલની કામગીરી કરે તો ચોક્કસ નિર્દોષ વાહન ચાલકો અકસ્માતનો ભોગ બનતા બચી શકશે.

બીજી તરફ પાણી ભરાઈ રહેવાને પગલે અહીંના વેપારીઓના ધંધા-રોજગાર પણ બંધ થઈ ગયા છે. હવે સવાલ એ છે કે શું તંત્ર હજુ કોઈ મોટી જાનહાનિની રાહ જોઈ રહ્યુ છે કે શું? શા માટે અનેક રજુઆત છતાં કોઈ કાર્યવાહી નથી કરવામાં આવી રહી?

તંત્રના પાપે સ્થાનિકો પરેશાન.

તંત્રના વાંકે વાહન ચાલકો પરેશાન.