ગુજરાતનાં 86 તાલુકામાં વરસાદ, સૌથી વધુ અંજારમાં 3 ઇંચ નોંધાયો, હજી બે દિવસ વરસાદની સંભાવના

અરબી સમુદ્રમાં (Arabian sea) સિસ્ટમ સક્રિય થતા વાતાવરણમાં પલટો આવ્યો છે, જેને કારણે અમદાવાદ (Ahmedabad) સહિત રાજ્યના મોટાભાગના વિસ્તારોમાં ગરમીની સાથે બફારાનું પ્રમાણ વધ્યું છે. આ સિસ્ટમની અસરથી આગામી 20 ઓકટોબર સુધી હળવાથી મધ્યમ વરસાદ (Rainfall) સાથે 25 ઓકટોબર સુધી રાજ્યમાં ગરમી-બફારાનું પ્રમાણ યથાવત રહેવાની સંભાવના છે. ત્યારે શનિવારની વાત કરીએ તો રાજ્યનાં (Gujarat) 86 તાલુકામાં વરસાદ નોંધાયો છે. જેમાં સૌથી વધુ કચ્છનાં અંજારમાં (Kutch, Anjar) 3 ઇંચ, બારડોલી, ગાંધીધામમાં અઢી ઇંચ, નેત્રંગ, વિજાપુર, વ્યારામાં બે ઇંચ વરસાદ પડ્યો છે.

હવામાન વિભાગે જણાવ્યા પ્રમાણે, અરબી સમુદ્રમાં સર્જાયેલા ડિપ્રેશનથી રાજ્યના વાતાવરણમાં પલટો આવ્યો છે. જો કે, ડિપ્રેશન હવે ઓમાન તરફ આગળ વધી ગયું છે. નોંધનીય છે કે, શનિવારે અમદાવાદમાં પણ બફારા સાથે વરસાદી માહોલ સર્જાયો હતો. અમદાવાદનું લઘુતમ તાપમાન સામાન્ય કરતાં 7 ડિગ્રી વધતાં લોકોએ દિવસ દરમિયાન ગરમીની સાથે અસહ્ય બફારાનો અનુભવ કર્યો હતો.

રાજ્યમાં અણધાર્યો વરસાદ પડતાં ખેતરોમાં તૈયાર પાકને વ્યાપક નુક્સાન થવાની ભીતિ ખેડૂતોએ દર્શાવી છે. તૈયાર થયેલા મગફળી, તલ, મગ, બાજરી, ગોવાર, કપાસ સહિતના પાકો પર પાણી વરસતાં પલળી ગયા છે. હજુ પણ વરસાદ ચાલુ રહેશે તો ખેડૂતોને રડવાનો વારો આવી શકે છે.

શનિવારે પૂર્વથી લઇ પશ્ચિમ સુધી કમોસમી વરસાદ વરસ્યો હતો. ભુજ, ગાંધીધામ, ભચાઉ, રાપર, નખત્રાણા, અબડાસા, માંડવી સહિતના તાલુકામાં સાંજે વીજળીના કડાકા ભડાકા સાથે ઝાપટાથી લઇને વરસાદ વરસ્યો હતો. અરબી સમુદ્રમાં સર્જાયેલા હળવા દબાણને લઇને હજુ પણ કચ્છમાં આગામી બેથી ત્રણ દિવસ વરસાદની આગાહી કરવામાં આવી છે.

ભુજમાં પણ શનિવાર સવારથી અસહ્ય બફારા બાદ સાંજે વીજળીના કડાકા ભડાકા સાથે પોણો ઇંચ જેટલો વરસાદ પડ્યો હતો. આ સાથે રાપર તાલુકામાં ગત મોડી રાત્રે કાનમેર, ગાગોદરસહિતની હાઇવેપટ્ટી અને આજુબાજુના વિસ્તારોમાં ભારે ઝાપટાં પડતાં ખેતરોમાં રહેલા પાકને ભારે નુકસાન થયું હતું.

શનિવારે બપોર બાદ બાદરગઢ, હમીપર, ઉમેયા, પ્રાગપર, ભીમાસર, વલભપર, છોટાપરસહિતના વિસ્તારોમાં વરસાદ પડ્યો હતો.જેના કારણે બાજરી, મગ,ગોવાર વગેરે તૈયાર પાકો પર પાણી પડતાં પલળી ગયા હતા. આ વરસાદને કારણે જગતનાં તાતને ઘણી ચિંતા થઇ રહી છે.