બનાસકાંઠા : સાંસદ પરબત પટેલની હાજરીમાં જ સોશિયલ ડિસ્ટન્સનાં ધજાગરા, ભીડની તસવીરો Viral

આનંદ જયસ્વાલ, બનાસકાંઠા : એકબાજુ માંડ માંડ કોરોના કેસ ઘટ્યા છે ત્યાં ફરી એકવાર રાજકીય મેળાવડાઓ શરૂ કરી દેવામાં આવ્યા છે. આજે બનાસકાંઠામાં સાંસદ પરબત પટેલની હાજરીમાં થરાદના માંગરોળ ગામે યોજાયેલા કાર્યક્રમમાં લોકોની ભીડ ઉમટી હતી. આ કાર્યક્રમમાં સોશિયલ ડિસ્ટન્સના ધજાગરા ઉડ્યા હતા. કાર્યક્રમની તસવીરો અને વીડિયો સોશિયલ મીડિયામાં વાયરલ થઈ રહી છે.

બનાવ વિગતો એવી છે કે કેન્દ્રમાં ભારતીય જનતા પાર્ટીની નરેન્દ્ર મોદી સરકારે સાત વર્ષનો સમયગાળો સમાપ્ત કર્યો છે. આ પ્રસંગે સેવાકીય કાર્યો દ્વારા સરકારે ઊજવણી કરવાનું નક્કી કર્યુ છે. તેવામાં આજે બનાસસકાંઠામાં કાર્યક્રમ યોજાયો હતો.

આ કાર્યક્રમ યોજાયો તેમાં સાંસદ પરબત પટેલ ઉપસ્થિત રહ્યા હતા. સેવા માટે યોજાયેલા કાર્યક્રમમાં લોકોને ઉકાળા અને સેનેટાઇઝરનું વિતરણ કરવામાં આવ્યું હતું. ચોક્કસથી આ તમામ વાતો સારી છે પરંતુ કોરોનાકાળમાં સંપૂર્ણપણે રાજકીય મેળાવડાઓ પર પ્રતિબંધ છે ત્યારે આ પ્રકારનો કાર્યક્રમ કેટલો યોગ્ય

માંડ માંડ ગુજરાતમાં સ્થિતિ થાળે પડી રહી છે. હજુ પણ રાજ્યના 36 શહેરોમાં રાત્રિ કર્ફ્યૂ અને જાહેર કાર્યક્રમો પર પ્રતિબંઘ છે. એ દિવસો વીત્યા એને બહુ સમય નથી થયો કે લોકોનાં ખાટલાની ખોટે અવસાન થયા. આ સ્થિતિ ભૂલી જઈને બનાસકાંઠામાં આજે ભીડે એકઠી થઈ હતી.

એકબાજુ સરકાર કર્ફ્યૂ નિયંત્રણો રાખે જ્યારે બીજી બાજુ સાંસદની હાજરીમાં બનાસકાંઠાના થરાદના માંગરોળ ગામે સોશિયલ ડિસ્ટન્સિંગનો ઉલાળીયો થાય તે બાબત અયોગ્ય છે. નિયમો તોડવામાં આવ્યા અને સોશિયલ ડિસ્ટન્સના ધજાગરા ઉડ્યા હોવાથી સોશિયલ મી઼ડિયા પર ઘટના વાયરલ થઈ રહી છે.