અરવલ્લીમાં વાવાઝોડું: અનેક ઘરના છાપરાં ઉડ્યા, 40 ઝાડ ધરાશાયી

અરવલ્લી જીલ્લાના મોડાસા તાલુકામાં તોફાની વંટોળે મુશ્કેલી પેદા કરી છે. અનેક ઘરના પતરા, નળીયા અને છત ઉડી ગઈ તો, રસ્તાઓ પર ઝાડ અને વીજ પોલ ધરાશાયી થતા, હાઈવે બંધ થઈ ગયો, જેને પગલે વાહનોની 10 કિમી લાંબી કતારો લાગી ગઈ છે.

પ્રાપ્ત માહિતી મુજબ, મોડાસા તાલુકામાં છેલ્લા કંટલાક કલાકથી વાવાઝોડા વંટોળે જનજીવન અસ્ત વ્યસ્ત કરી દીધુ છે. તોફાની વંટોળની સાથે વરસાદથી વાતાવરણ ડહોળાઈ ગયું છે. કેટલી જગ્યાએ ભારે પવનના કારણે મકાનના પતરા, નળીયા ઉડી ગયા છે.

અરવલ્લીના ત્રણ તાલુકામાં વાવાઝોડાના કારણે ભારે નુકશાન થયાના સમાચાર મળી રહ્યા છે. અરવલ્લીના મોડાસા, મેઘરજ અને ભિલોના ગામોમાં અનેક વૃક્ષો અને વીજ પોલ ધરાશાયી થતા અંધારપટ છવાઈ ગયો છે. કેટલાએ કાચા મકાનોના પતરા, નળીયા અને થત ઉડી જતી લોકો પરેશાન થઈ ગયા છે.

આ બાજુ ખેડૂતોમાં પણ ચિંતાનું મોજુ ફરી વળ્યું છે. અચાનક આવેલા કમોસમી વરસાદે ઉભા પાકને નુકશાન પહોંચાડ્યું છે. મોડાસા પંથકમાં બાજરી અને મકાઈના પાકને મોટુ નુકશાન પહોંચ્યું છે. ઉભા પાકનો સોંથો વળી ગયો છે.

સૌથી વધારે મુશ્કેલી મોડાસા રાજેન્દ્રનગર રોડ પર ઉભી થઈ છે. આ રોડ પર 40થી વધુ નાના મોટા ઝાડ ધરાશાયી થયા છે. જેને પગલે બે કલાકથી હઈવે બંધ થઈ ગયો છે. અનેક વાહનો ટ્રાફિક જામમાં ફસાઈ ગયા છે. લગભગ 10 કિમી લાંબી વાહનોની કતાર ટ્રાફિક જામમાં ફસાઈ છે. તંત્ર દ્વારા જેસીબીની મદદથી હાઈવે પરથી ઝાડ હટાવવાની કામગીરી હાથ ધરવામાં આવી રહી છે. થોડા જ સમયમાં હાઈવે પૂર્વવત થઈ જસે તેમ જણાવવામાં આવી રહ્યું છે.