Aravalli News : અરવલ્લીમાં ટેમ્પો કાર વચ્ચે અકસ્માત, કપડવંજના બે સગાભાઈ સહિત ચારના મોત

હાર્દિક પટેલ, અરવલ્લીઃ અત્યારે દિવાળી પર્વ (Diwali festival) ચાલે છે ત્યારે લોકો પરિવાર સાથે ફરવા નીકળે છે. ક્યારેક રસ્તામાં દુર્ઘટનાનો ભોગ બનતા હોય છે. અને ફરવા નીકયેલા લોકો મોતને ભેટે છે. આવી જ એક કમકમાટી ભરી ઘટના ઉત્તર ગુજરાતના અરવલ્લી જિલ્લામાં (car accident in Arvalli) બની હતી.

અહીં ધનસુરા-મોડાસા હાઈવે (Dhansura modasa highway) ઉપર રહિયોલ ફાટક નજીક ટેમ્પો અને કાર વચ્ચે (tempo and car accident) ધડાકાભેર ટક્કર થઈ હતી. જેમાં ચાર લોકોના મોત નીપજ્યા હતા. અકસ્માતમાં કપંડવંજના આંત્રોલીના પટેલ પરિવારના બે સગાભાઈ અને રાજપુરના એક યુવક સહિત ચાર લોકોના ઘટના સ્થળે કમકમાટી ભર્યા મોત નીપજ્યા હતા. ઘટનાની જાણ થતાં પોલીસ ઘટના સ્થળે આવીને વધુ તપાસ હાથધરી હતી. ઈજાગ્રસ્તોને સારવાર માટે હોસ્પિટલ ખાતે ખસેડ્યા હતા.

ઘટના અંગે મળતી માહિતી પ્રમાણે મોડાસા-ધનસુરા રોડ પર ટેમ્પો-ટ્રકે કારને અડફેટે લેતા ગમખ્વાર અકસ્માતમાં ત્રણ લોકોના ઘટનાસ્થળે અને એક વ્યક્તિનું સારવાર દરમિયાન મોત નીપજ્યું હતું.

કપડવંજ તાલુકાના આંત્રોલી ગામના મયંક વાસુદેવ પટેલ, નીરવ વાસુદેવ પટેલ, રાજપુરના બિપીન રણછોડભાઈ પટેલ, કાંતિલાલ ભેમજીભાઈ રોત, કાંતિલાલ નાનજીભાઈ કટારા કારમાં સવારે મોડાસાથી ધનસુરા પરત ફરી રહ્યા હતા.

ત્યારે રહિયોલ ફાટક નજીક ટ્રક યમદૂત બની ત્રાટકી કારને ધડાકાભેર ટક્કર મારતા કારમાં સવાર 3ના ઘટનાસ્થળે કમકમાટીભર્યા મોત નીપજ્યા હતા. અકસ્માતમાં ઈજાગ્રસ્ત થયેલા કાંતિલાલ રોતનું સારવાર દરમિયાન મોત નીપજ્યું હતું. જ્યારે કાંતિલાલ નાનજીભાઈ કટારાના શરીરે ગંભીર ઈજાઓ પહોંચી હતી.

દિવાળી પર્વમાં વહેલી સવારે 108 ઇમરજન્સી એમ્બ્યુલન્સના સાયરનથી સમગ્ર વિસ્તાર ગુંજી ઉઠ્યો હતો. અકસ્માતના પગલે લોકોના ટોળેટોળા ઉમટ્યા હતા. ધનસુરા પોલીસ ઘટનાસ્થળે પહોંચી મૃતકોની લાશને પીએમ માટે ખસેડી કાયદેસરની કાર્યવાહી હાથ ધરી હતી.

વધુ મળતી માહિતી પ્રમાણે અકસ્માતમાં ઈજાગ્રસ્ત થયેલા ઈજાગ્રસ્તોને 108 ઇમરજન્સી એમ્બ્યુલન્સ મારફતે સાર્વજનિક હોસ્પિટલ ખસેડાયા હતા. અકસ્માત સ્થળેથી સ્થાનિકોને 50 હજાર રોકડા અને ત્રણ મોબાઈલ મળી આવતા ધનસુરા પોલીસને સુપ્રત કર્યા હતા.