અલ્પેશ બાદ હવે ધવલસિંહ ઝાલાની બીજેપી નેતા સાથેની તસવીર આવી સામે

હાર્દિક પટેલ, અરવલ્લી : એક દિવસ પહેલા અલ્પેશ ઠાકોર અને બીજેપીના નેતા શંકાર ચૌધરી સાથેની તસવીરો વાયરલ થઈ હતી. હવે બાયડના કોંગ્રેસના ધારાસભ્ય ધવલસિંહ ઝાલાની ભાજપના નેતા સાથેની તસવીરો વાયરલ થઈ છે. અહીં એક વાત નોંધવી રહી કે રાજકારણમાં એક બીજાના હરીફ કહેવાતા લોકો ઘણી વખત સારા મિત્રો પણ હોઈ શકે છે. આ ઉપરાંત સામાજિક પ્રસંગોએ વિરોધી ગણાતા નેતાઓ પણ એક મંચ પર આવતા હોય છે. જોકે, હાલ અલ્પેશ ઠાકોર કોંગ્રેસ સાથે છેડો ફાડી ચુક્યો છે અને કોંગ્રેસના અન્ય ધારાસભ્યો પણ તેનો સાથે આપી શકે છે તેવી શક્યતાને ધ્યાનમાં રાખીને આ તસવીરો ખૂબ મહત્વની બની જાય છે.

ધવલસિંહની જે તસવીર વાયરલ થઈ છે તેમાં તેઓ બાયડ તાલુકાના ભાજપના તાલુકા પંચાયતના સભ્ય અને તાલુકા પ્રમુખ સાથે નજરે પડી રહ્યા છે. આ મામલે કોંગ્રેસી નેતા ધવલસિંહે જ સોશયિલ મીડિયામાં તસવીર પોસ્ટ કરી હતી. (તસવીર : શંકર ચૌધરી સાથે અલ્પેશ ઠાકોરની સેલ્ફી)

મળતી માહિતી પ્રમાણે ધવલસિંહે ભાજપના નેતાના પુત્રના લગ્નમાં હાજરી આપી હતી. આ દરમિયાન તેઓ ભાજપના નેતાઓ સાથે હળવાશના મૂડમાં દેખાયા હતા. (શંકર ચૌધરી સાથે અલ્પેશ ઠાકોર)

નોંધનીય છે કે કોંગ્રેસ સાથે છેડો ફાડ્યા બાદ અલ્પેશ ઠાકોરે અમદાવાદ ખાતે આવેલા પોતાના ઘરના વાસ્તુપૂજનમાં બીજેપીના પ્રદેશ અધ્યક્ષ જીતુભાઈ વાઘાણી અને ગૃહ રાજ્યમંત્રી પ્રદીપસિંહને આમંત્રણ આપ્યું હતું.

બાદમાં વાવના ધારાસભ્ય ગેનીબેન ઠાકોરના ઘરે લગ્નપ્રસંગમાં અલ્પેશ ઠાકોર બીજેપીના નેતા શંકર ચૌધરી સાથે જોવા મળ્યો હતો. અહીં બંને નેતાઓએ સાથે ભોજન પણ લીધું હતું.