શામળાજી: PSIએ દારૂના નશામાં ચાલકોને ફટકાર્યાં, લોકોએ કર્યાં આવા હાલ

અરવલ્લીઃ કાયદાના રખેવાળો જ નિયમોના ખુલ્લેઆમ લીરેલીરા ઉડાવી રહ્યા હોવાનો એક બનાવ અરવલ્લી જિલ્લામાં સામે આવ્યો છે. ગુજરાતમાં દારૂબંધી છે ત્યારે અરવલ્લી જિલ્લા પોલીસ હેડક્વાર્ટરના પીએએસઆઈએ દારૂપીને ધમાલ મચાવી હતી. એટલું નહીં PSIને નશાનું શૂરાતન ચડ્યું હોય તેમ વાહન ચાલકો સાથે બબાલ કરીને તેમને માર માર્યો હોવાનો એક વીડિયો સોશિયલ મીડિયામાં વાયરલ થયો છે.  આ અંગેની તપાસ ડીવાયએસપીને સોંપવામાં આવી છે. જિલ્લા પોલીસ વડાએ દારૂ પીને બબાલ કરવાના કેસમાં પીએસઆઈને સસ્પેન્ડ કરી દીધો છે.(સ્ટોરીઃ હાર્દિક પટેલ, અરવલ્લી)

મળતી માહિતી પ્રમાએ પોલીસ સબ ઇન્સ્પેક્ટર એચ.જે.ખરાડી અરવલ્લી જિલ્લા પોલી હેડક્વાર્ટર ખાતે ફરજ બજાવે છે. પીએસઆઈ દારૂના નશામાં તેમજ લોહીલુહાણ હાલતમાં હોય તેવો એક વીડિયો સામે આવ્યો છે. આ અંગે મળતી માહિતી પ્રમાણે પીએસઆઈએ દારૂ પીને હાઇવે પરથી પસાર થતાં વાહન ચાલકો સાથે મારામારી કરી હતી.

વાહન ચાલકો સાથે થયેલી બાબલમાં પીએસઆઈને પણ ઈજા પહોંચી છે. વાયરલ થયેલા વીડિયોમાં પીએસઆઈને લોહીલુહાણ હાલતમાં જોઈ શકાય છે. તેમના મોઢામાંથી લોહી વહી રહ્યું છે, તેમજ કપાળના ભાગે પણ ઈજા પહોંચી છે.

લોકોના જણાવ્યા પ્રમાણે પીએસઆઈએ હાઇવે પરથી પસાર થતાં ટ્રક ડ્રાઇવરોને માર માર્યો હતો, એટલું જ નહીં તેમના વાહનોનાં કાચ પણ તોડી નાખ્યા હતા. આ અંગે અમુક વ્યક્તિઓએ પીએએસઆઈ દારૂના નશામાં હોય એવો વીડિયો શૂટ કરી લીધો હતો. વીડિયોમાં વ્યક્તિ જણાવી રહ્યો છે કે પીએએસઆઈએ તેના ડ્રાઇવરને માર માર્યો છે, તેમજ તેના ટ્રકનો કાચ તોડી નાખ્યો છે.

વીડિયોમાં જોઈ શકાય છે કે પીએસઆઈની લોહીલુહાણ હાલતમાં અમુક પોલીસકર્મીઓ ગાડીમાં બેસાડી રહ્યા છે. જ્યારે બીજી તરફ લોકોએ પીએસઆઈને પકડી રાખ્યો છે અને તેનો વીડિયો ઉતારવમાં આવી રહ્યો છે. લોકો પીએસઆઈને પોલીસ સ્ટેશન લઈ જવાની તેમજ તેની સામે કેસ કરવાની વાત કરી રહ્યા છે.

આ અંગે મળતી માહિતી પ્રમાણે આ બનાવ સામે આવ્યા બાદ પોલીસ બેડામાં ખળભળાટ મચી ગયો છે. આ વાત જિલ્લા પોલીસ વડા પાસે પહોંચ્યા બાદ પોલીસ વડાએ આ કેસની તપાસ ડીવાયએસપીને સોંપી છે.