મહિલાએ દગાબાજ પ્રેમીની હત્યા કરીને તેના ટુકડા કરીને મજૂરોને ખવડાવી દીધા

અબુ ધાબીમાં એક મહિલાએ જે કૃત્ય કર્યું છે તેને સાંભળીને જ કંપારી છૂટી જાય છે. મહિલા પર આક્ષેપ છે કે તેણે પોતાના પૂર્વ બોયફ્રેન્ડની હત્યા કરી નાખી હતી. બાદમાં તેના શરીરના વિવિધ અવયવોને રાંધીને તેને બાંધકામનું કામ કરતા મજૂરોને ખવડાવી દીધા હતા. (પ્રતિકાત્મક તસવીર)

ખલીજ ટાઇમ્સના જણાવ્યા પ્રમાણે 30 વર્ષની મહિલાએ કોર્ટમાં સ્વીકાર કર્યો હતો કે તેણીએ તેના પૂર્વ બોયફ્રેન્ડની હત્યા કરી નાખી હતી. બાદમાં તેના શરીરના નાના-નાના ટુકડા કરી નાખ્યા હતા. જે બાદમાં તેના માંસને રાંધીને મજૂરોને ખવડાવી દીધું હતું. મહિલાએ મજૂરોને કહ્યું હતું કે તેણીએ મોરક્કન ડીશ બનાવી છે.

અરેબિયન ન્યૂઝપેપરના જણાવ્યા પ્રમાણે મહિલાએ બોયફ્રેન્ડ તરફથી પ્રેમમાં દગો મળ્યા બાદ બદલો લેવાની ભાવના સાથે પૂર્વ પ્રેમીની હત્યા કરી નાખી હતી. જેની હત્યા કરવામાં આવી છે તે યુવકની ઉંમર 20 વર્ષની આસપાસ હોવાનું માલુમ પડ્યું છે.

આ બનાવ એક મહિલા પહેલા બન્યો હતો. પરંતુ જેની હત્યા થઈ હતી તે યુવકનો ભાઈ જ્યારે તેની શોધખોળ માટે મહિલાને ઘરે પહોંચ્યો ત્યારે આ વાત પ્રકાશમાં આવી હતી. શરૂઆતમાં મહિલાએ તેના વિશે કંઈ જ માહિતી હોવાનો ઇન્કાર કર્યો હતો. પરંતુ પાછળથી તે ભાંગી પડી હતી અને જણાવ્યું હતું કે તેના ભાઈનું કોઈ અન્ય મહિલા સાથે પણ અફેર ચાલી રહ્યું હતું.

આ સમયે પીડિત યુવકના ભાઈએ મહિલાના ઘરમાં રહેલા બ્લેન્ડરમાં માણસના દાંત જોયા હતા. જે બાદમાં તેને શંકા ગઈ હતી અને તેણે પોલીસને જાણ કરી હતી. પોલીસે મહિલાની ધરપકડ કરીને પૂછપરછ કરતા મહિલાએ પોતાનો ગુનો કબૂલી લીધો હતો.