કોણ છે પ્રમોદ સાવંત? જાણો ગોવાના નવા મુખ્યમંત્રી વિશે

ન્યૂઝ18 ગુજરાતી : ભારતીય જનતા પાર્ટીએ પ્રમોદ સાવંતને ગોવાના નવા મુખ્યમંત્રી બનાવ્યા છે. ઓક્ટોબર 2018માં જ્યારે મનોહર પારિકર બીમાર હોવાની જાહેરાત કરવામાં આવી ત્યારથી જ તેઓ ગોવાની રાજનીતિમાં સક્રિય થઈ ગયા હતા. ફેબ્રુઆરીમાં જ્યારે મનોહર પારિકરને AIIMSમાં દાખલ કરવામાં આવ્યા ત્યારે પ્રમોદ સાવંતે લોકોને આ અંગેની માહિતી આપી હતી. તો જાણીએ ગોવાના નવા મુખ્યમંત્રી વિશે....

સાવંત ઉત્તર ગોવાની Sanquelim વિધાનસભા બેઠક પરથી ચૂંટાઈ આવ્યા છે. તેઓ વ્યવસાયે એક આયુર્વેદિક ડોક્ટર છે. તેમને મનોહર પારિકરના નજીકના માનવામાં આવે છે.

પ્રમોદ સાવંતની પત્ની સુલક્ષણ સાવંત શિક્ષિકા રહી ચુક્યાં છે, હાલ તેઓ બીજેપી મહિલા મોર્ચાના અધ્યક્ષા છે. પ્રમોદ સાવંતનો જન્મ 24મી એપ્રિલ, 1973ના રોજ થયો હતો. તેમણે આયુર્વેદનો અભ્યાસ કર્યો છે.

ગત વર્ષે સપ્ટેમ્બરમાં કોંગ્રેસે પ્રમોદ સાવંતને વિધાનસભા અધ્યક્ષ પદેથી હટાવવા માટેની નોટિસ આપી હતી. કોંગ્રેસે દાવો કર્યો હતો કે ગોવાની બીજેપી સરકાર લઘુમતિમાં છે. છેલ્લા બે ત્રણ દિવસથી પ્રમોદ સાવંતનું નામ ખૂબ ચર્ચામાં હતું. એવી અટકળો લગાવવા આવી રહી હતી કે બીજેપીને સમર્થન કરનારા અન્ય પક્ષો પ્રમોદ સાવંતના નામ પર સહમત નહીં થાય.

શનિવારે ગોવાના મુખ્યમંત્રી મનોહર પારિકરનું 63 વર્ષની ઉંમરે નિધન થયું હતું. તેઓ ઘણા લાંબા સમયથી બીમાર હતા. જે બાદમાં બીજેપી અને કોંગ્રેસની સતત બેઠકો મળી રહી હતી. એટલું જ નહીં શનિવારે કોંગ્રેસ ગોવાના રાજ્યપાલ મૃદુલા સિંહાને મળીને સરકાર બનાવવાનો દાવો પણ રજુ કર્યો હતો.

નોંધનીય છે કે ગોવા વિધાનસભાની હાલ ત્રણ બેઠક ખાલી છે. આ બેઠક પર 23મી એપ્રિલના રોજ ચૂંટણી યોજાશે. એટલા માટે હાલ 37 બેઠક માટે બહુમતનો આંકડો 19 છે.

સત્તાધારી બીજેપીને(12 બેઠક) મહારાષ્ટ્ર ગોમંતક પાર્ટીના ત્રણ, ગોવા ફોરવર્ડ પાર્ટીના ત્રણ અને ત્રણ અપક્ષ ધારાસભ્ય સાથે 21 ધારાસભ્યોનું સમર્થન છે. જ્યારે કોંગ્રેસ પાસે 14 ધારાસભ્ય છે. હવે જો સાથી પક્ષો બીજેપી સાથે દગો કરે છે તો ગોવામાં બીજેપી સરકાર પડી શકે છે.