Orange Alert in Delhi: દિલ્હીવાસીઓ ઠંડીમાં ઠૂંઠવાયા, ઘણી ટ્રેનો અને ફ્લાઈટના ટાઇમટેબલ ખોરવાયા

ઉત્તર ભારતમાં ફરી એકવાર કડકડતી ઠંડીની શરુઆત થઈ ગઈ છે, દિલ્હીમાં ઓરેન્જ એલર્ટ આપવામાં આવ્યું છે, ઘણી ટ્રેનોના ટાઇમટેબલને ઠંડીની અસર થઈ છે, ધૂમ્મસના કારણે કેટલીક ટ્રેનો મોડી ચાલી રહી છે. દેશના કેપિટલ સિટીમાં કૉલ્ડ વેવ કન્ડિશન ઉભી થઈ છે. ભારતીય હવામાન વિભાગે રવિવાર માટે દિલ્હીમાં ઓરેન્જ એલર્ટ જાહેર કર્યું છે. વિઝિબ્લિટી લો હોવાના કારણે ઘણી ફ્લાઈટના ટાઇમટેબલ પર પણ અસર થઈ રહી છે.

મુસાફરે હવામાન અંગે પોતાનો અનુભવ શરે કરીને જણાવ્યું કે, "એરપોર્ટ પર વિઝિબ્લિટી કોલ્ડ વેવના કારણે ઘણી જ લો છે, અમે ઠંડીનો અનુભવ કર્યો છે." રવિવારના વહેલી સવારના દ્રશ્યો સામે આવ્યા છે જેમાં દેખાય છે કે વિઝિબ્લિટી ઘણી જ લો છે. આ જ રીતે ઘણી ટ્રેનોને પણ ધૂમ્મસના કારણે માઠી અસર પડી રહી છે. જેમાં મહાબોધી એક્સપ્રેસ, ફરક્કા એક્સપ્રેસ, સંપર્ક ક્રાંતિ એક્સપ્રેસ, ગોરખધામ સુપરફાસ્ટ એક્સપ્રેસ અને પદ્માવતી એક્સપ્રેસ સહિતની ટ્રેનોનો સમાવેશ થાય છે.

દિલ્હી એરપોર્ટના અધિકારીના જણાવ્યા પ્રમાણે રવિવારે સવારે 6 વાગ્યા સુધીની ફ્લાઈટને ડાઈવર્ઝન આપવામાં આવ્યું હતું. અધિકારીએ ANI સાથે કરેલી વાતચીતમાં જણાવ્યું કે, "લગભગ 20 જેટલી ફ્લાઈટના ટાઇમટેબલને ઠંડીની અસર થઈ હતી."

ઠંડીનું જોર વધવાના કારણે શનિવારે દિલ્હીવાસીઓ ધ્રૂજી ગયા હતા. અહીં પારે હિમાચલપ્રદેશ અને ઉત્તરાખંડ સહિતના અને જમ્મુ-કાશ્મીરના હિલસ્ટેશન કરતા પણ દિલ્હી વધારે ઠંડું થઈ ગયું હતું. દિલ્હીનું શનિવારે લઘુત્તમ તાપમાન 1.9 ડિગ્રી સેલ્સિયસ નોંધાયું છે.

દિલ્હી સહિત રાજસ્થાન, હરિણાયાણા અને ચંદીગઢમાં પણ રવિવારે કોલ્ડ વેવની અસર યથાવત રહેવાની આગાહી કરવામાં આવી છે. જોકે, બે દિવસ પછી ઠંડીનું જોર ઘટવાની અને તેમાંથી રાહત મળવાની આગાહી હવામાન વિભાગ દ્વારા કરવામાં આવી છે. આમ થવા પાછળનું કારણ વેસ્ટર્ન ડિસ્ટર્બન્સ હોવાનું હવામાન વિભાગે જણાવ્યું છે.

દેશના અન્ય રાજ્યો જેવા કે મધ્યપ્રદેશ, ગુજરાત, હરિયાણા, ચંદીગઢ, ઉત્તરાખંડ, પશ્ચિમ બંગાળ, આગામી સમયમાં ઠંડીનું જોર ઘટશે. દિલ્હી સહિતના રાજ્યોમાં કોલ્ડ વેવની અસરમાં ઘટાડો થતો જશે. કોલ્ડ વેવના કારણે લોકોના જનજીવન પર પણ તેની માઠી અસર પડી રહી છે.

ગુજરાતમાં પણ અઠવાડિયાની શરુઆતમાં કડાકા સાથે ઠંડી પડ્યા પછી તેના જોરમાં ઘટાડો થઈ ગયો છે. રાજ્યના હવામાન વિભાગ દ્વારા ઠંડીનું જોર ઘટવાની સંભાવના વ્યક્ત કરી છે, પરંતુ આગામી દિવસમાં ફરી એકવાર ઠંડીનો ચમકારો આવી શકે છે.