Photos: દુબઈમાં નવા હિન્દુ મંદિરની એક ઝલક જોવા માટે લોકોની પડાપડી, જુઓ તસવીરોમાં

દુબઈમાં નવા હિન્દુ મંદિરની પહેલી ઝલક મેળવવા માટે યુએઈ નિવાસીઓની ભીડ ઉમટી છે. આ મહિનાની શરૂઆતમાં દુબઈમાં નવું હિન્દુ મંદિર ખુલ્લુ મૂકવામાં આવ્યું છે. ત્યારબાદ સંયુક્ત આરબ એમિરાતના હજારો સ્થાનિક લોકો અહીં દર્શન કરવા માટે ઉમટી પડ્યા છે.

મંદિરમાં પહેલા દિવસથી જ અને ખાસ કરીને વીકએન્ડમાં મોટી સંખ્યામાં લોકો આવે છે. ગલ્ફ ન્યૂઝના જણાવ્યા અનુસાર, આ મંદિરને ઔપચારિક રીતે સામાન્ય લોકો માટે દશેરાથી ખુલ્લુ મૂકવામાં આવશે. આ મંદિરમાં દરેક ધર્મના લોકો દર્શન કરવા માટે આવી શકે છે.

મંદિરમાં અંદાજે 16 હિન્દુ દેવી-દેવતાઓની મૂર્તિઓ મૂકવામાં આવી છે. દૂર દૂરથી લોકો અહીં દર્શન તેમજ આંતરિક કલાકારીગરી જોવા માટે પહોંચી રહ્યા છે. મંદિર પ્રશાસને તેમની વેબસાઇટમાં ક્યૂઆર કોડ દ્વારા બુકિંગ કરવાની સુવિધાનું 1 સપ્ટેમ્બરે ઉદ્ઘાટન કર્યુ હતુ.

ફોટોમાં જોઈ શકાય છે કે, મંદિરમાં શ્રીરામ, તેમની પત્ની સીતા અને ભગવાન રામના ભાઈ લક્ષ્મણની એક ખૂબ સરસ મૂર્તિ મૂકવામાં આવી છે અને તેને લાલ રંગના ફૂલની માળા પહેરાવવામાં આવી છે. મૂર્તિના છેડે હનુમાનજીને ભગવાન શ્રીરામ, લક્ષ્મણ અને માતા સીતાને પ્રણામ કરતી મુદ્રામાં મૂકવામાં આવ્યા છે.

તસવીરોમાં જોઈ શકાય છે કે, શિવના વાહન અથવા અવતાર કહેવાતા દ્વારપાળ નંદીની મૂર્તિ પણ છે. કેટલાક શ્રદ્ધાળુઓ તેમની મનોકામના નંદીના કાનમાં આવીને કહે છે, જેથી તેમની ઇચ્છા પૂરી થાય. સોશિયલ મીડિયામાં આ તસવીર જોઈને ભારતીયો ખૂબ ખુશ જોવા મળી રહ્યા છે.

ઉલ્લેખનીય છે કે, મંદિર સવારે સાડા 6 વાગ્યાથી રાતના 8 વાગ્યા સુધી ખુલ્લુ રહે છે. ઓક્ટોબરના અંતર સુધીમાં મોટાભાગનું બુકિંગ થઈ ગયુ છે. બુકિંગ સુવિધા ઓક્ટોબર સુધી આપવામાં આવશે, ત્યારબાદ સામાન્ય નાગરિકો મંદિર ખૂલ્યા પછી કોઈપણ સમયે દર્શન કરી શકે તેવી વ્યવસ્થા કરવામાં આવશે.