યુક્રેનની વોર ગર્લ્સ નીકળી નકલી! મૂળ રશિયાની આ મહિલાઓને યુદ્ધ સાથે નથી લેવા દેવા, પ્લાસ્ટિકના છે હથિયાર!

Fake Ukrainian War Girls : યુક્રેન અને રશિયાના સંઘર્ષમાં ઘણા ફેક ન્યૂઝ (Fake news) પણ ફેલાવવામાં આવી રહ્યા છે. યુદ્ધના (Russia Ukraine war)પ્રોપેગેન્ડાને લોકો ઘણી વખત સત્ય માની લે છે. આવું જ વાયરલ થઈ રહેલી એક તસવીરમાં જોવા મળે છે. આર્મી યુનિફોર્મમાં માતા-પુત્રીનો ફોટો સોશિયલ મીડિયા પર વાયરલ (Viral Ukrainian Women in Airforce Uniform) થઈ રહ્યો છે. આ બંને યુક્રેનિયન મહિલાઓ હોવાનો અને રશિયાના દળો સામે લડવા માટે બંદૂકો પકડી હોવાનો દાવો કરવામાં આવે છે. જો કે, હવે આ દાવો પણ પોકળ સાબિત થયો છે અને આ ફોટામાં રહેલી યુવતીઓ યુક્રેનના સૈનિક નથી પરંતુ રશિયન મહિલાઓ હોવાનું ખુલ્યું છે.

અત્યાર સુધી યૂક્રેનના લડાકુઓની પ્રશંસા લૂંટતી તસવીરની સચ્ચાઇ સામે આવતા લોકો ચોંકી ઉઠ્યા છે. ફોટોમાં દેખાતી બે મહિલાઓ સંબંધમાં માતા-પુત્રી છે, પરંતુ તેઓ યુક્રેનની નથી. તેઓ રશિયા સાથે સંબંધ ધરાવે છે અને તેઓ લડાઈ લડવા પણ જતી નથી. ડેલી સ્ટારના રિપોર્ટ અનુસાર આર્મીના ડ્રેસમાં પોતાની માતા સાથે જે સુંદર યુવતીની તસવીર વાયરલ થઇ રહી છે, તે રશિયન સુંદરી છે. યુદ્ધભૂમિમાં ઉતરવા માટેનો દાવો પણ બનાવટી છે.

અહીં ઉલ્લેખનીય છે કે, આ મહિલાઓ રશિયાની છે, પરંતુ રશિયા-યુક્રેન યુદ્ધ સાથે તેમનો કોઇ સીધો સંબંધ નથી. તેમના ડ્રેસ પણ સેનાના નથી, કે તેમના હાથમાં રહેલાં શસ્ત્રો પણ સાચા નથી.

તે સુંદર યુવતીનું નામ એલેના ડેલિજિઓઝ (Elena Deligioz) છે. તે રશિયાની જાણીતી સોશિયલ મીડિયા ઈન્ફ્લુએન્સર છે. રશિયામાં ફેમસ એલેનાના ઇન્સ્ટાગ્રામ પર 1 લાખ 79 હજારથી વધુ ફોલોઅર્સ છે. તેના ફોટાને હજારોની સંખ્યામાં લાઇક્સ મળે છે. રસપ્રદ વાત તો એ છે કે, મોટા ભાગના ફોટામાં તેઓ સૈનિક જેવા દેખાય છે. એટલા માટે લોકો તેમને સૈનિક સમજે છે.

વધુ વિગતો મુજબ એલેના એરક્રાફ્ટ ગેમ રમે છે અને ગેમ રમતી વખતે તે આર્મી યુનિફોર્મ જેવા કપડાં પહેરે છે. આ ગેમમાં પ્લાસ્ટિક બુલેટનો ઉપયોગ કરવામાં આવે છે અને પ્લાસ્ટિકના હથિયાર પણ હોય છે.

વાયરલ થયેલો આ ફોટા મામલે તપાસ કરવામાં આવી તો રોચક વાતનો ખુલાસો થયો હતો. આ ફોટો ગયા વર્ષે ફેબ્રુઆરીમાં ઇન્સ્ટાગ્રામ પર પોસ્ટ કરેલા વીડિયો પરથી લેવામાં આવ્યો છે. નોંધનીય છે કે, તેના સોશિયલ મીડિયા એકાઉન્ટમાં તમામ ફોટોઝ હથિયાર સાથેના છે. . (All Photos Credit- Instagram/@_elena_deligioz_official_)