Mumbai Rains: મૂશળધાર વરસાદથી મુંબઈ પાણી-પાણી, આજે રજા જાહેર

મુંબઈઃ મહારાષ્ટ્ર (Maharashtra)ના પાટનગર મુંબઇ (Mumbai)માં પડેલા મૂશળધાર વરસાદના કારણે અનેક વિસ્તારોમાં પાણી ભરાઈ ગયા છે. રસ્તાઓ તળાવ જેવા લાગી રહ્યા છે અને કલાકો સુધી લોકોની ગાડીઓ પાણીમાં ફસાયેલી રહી.

મુંબઈમાં સ્થિતિ એવી થઈ ગઈ કે અનેક સ્થળો પર પોલીસ (Police)એ વરસાદમાં ફસાયેલા લોકોને સ્થાનિક લોકોની મદદથી બહાર કાઢ્યા અને સુરક્ષિત સ્થળે પહોંચાડ્યા. મુંબઈમાં પડેલા આ ભારે વરસાદની અસર ટ્રેન વ્યવહાર ઉપર પણ પડ્યો છે.

બસ અને રેલ સેવાઓને તાત્કાલિક અસરથી રોકી દેવામાં આવી છે. ભારે વરસાદના કારણે અનેક ટ્રેનો રદ કરવી પડી, આ કારણે અનેક લોકો સ્ટેશન પર કલાકો સુધી ફસાયેલા રહ્યા. હવામાન વિભાગે કહ્યું છે કે બુધવારે પણ મુંબઈમાં ભારે વરસાદ પડી શકે છે. વિભાગે વાદળો છવાયેલા રહેવાની તથા ભારે વરસાદની આગાહી કરી છે.

મુંબઈમાં રસ્તાઓ પર અનેક સ્થળે પાણી ભરાઈ જવાના કારણે તથા હવામાન વિભાગના એલર્ટને ધ્યાને લઈ BMCએ તમામ સરકારી અને ખાનગી સંસ્થાનોમાં આજે રજા જાહેર કરી દીધી છે. આ દરમિયાના માત્ર ઇમરજન્સી સેવાઓને જ મંજૂરી હશે. બીજી તરફ નગર નિગમના આયુક્તે લોકોને જરૂર ન હોય તો ઘરની બહાર ન જવાની અપીલ કરી છે.

મંગળવાર મોડી રાત્રે પડેલા વરસાદ અને પાણી ભરાઈ જવાના કારણે સેન્ટ્રલ રેલવેએ અનેક ટ્રેનો રદ કરી દીધી છે અને કેટલાક ટ્રેનોના રૂટ ડાયવર્ટ કરી દીધા છે.

સેન્ટ્રલ રેલવેએ કહ્યું છે કે સાયન-કુર્લા અને મસ્જિદમાં સતત વરસાદ અને પાણી ભરાવાના કારણે મધ્ય રેલવે પર ઉપનગરીય સેવાઓ સીએસએમટી-થાણે/સીએસએમટી-વાશીની વચ્ચે સસ્પેન્ડેડ છે. તેની સાથે જ શટલ સેવા થાણે-કલ્યાણ અને તેની આગળની તરફ વાશી અને પનવેલની વચ્ચે ચાલી રહી છે. લાંબા અંતરની સ્પેશલ ટ્રેનોને રિશિડ્યૂલ કરવામાં આવી રહી છે.