મુંબઈમાં 11 દિવસમાં જ વરસી ગયો મહિનાભરનો વરસાદ, IMDએ જાહેર કર્યું હાઇ અલર્ટ

મુંબઈ. મહારાષ્ટ્ર (Maharashtra)ના પાટનગર અને દેશની આર્થિક રાજધાની મુંબઈ (Mumbai)માં છેલ્લા ત્રણ દિવસથી ભારે વરસાદ પડી રહ્યો છે. સ્થિતિ એવી છે કે ચોમાસું (Monsoon 2021) બેઠાના માત્ર 11 દિવસમાં જ વરસાદનો આંકડો 505 મિલીમીટરના મહિનાના સરેરાશને પાર કરી ગયો છે. મુંબઈમાં 565.2 મિમી વરસાદ (Rainfall) નોંધાઈ ચૂક્યો છે. કહેવામાં આવી રહ્યું છે કે શુક્રવાર રાતથી લઈને મંગળવાર સુધી મુંબઈમાં ભારે વરસાદ પડી શકે છે. આ દરમિયાન 200 મિમી વરસાદનું અનુમાન છે. હવામાન વિભાગ (IMD)એ મુંબઈ, થાણે, રાયગઢ અને રત્નાગિરીમાં રવિવાર માટે હાઇ અલર્ટ જાહેર કર્યું છે.

રવિવારે મહારાષ્ટ્રના કેટલાક હિસ્સાઓમાં 24 કલાકમાં 204.5 મિમી સુધી વરસાદની શક્યતા છે. મંગળવાર સુધી શહેરના કોંકણ વિસ્તારમાં ઓરેન્જ એલર્ટ રહેશે. સાંતાક્રૂઝ સ્થિત વેધર સ્ટેશન મુજબ, શુક્રવાર રાત્રે 8:30 વાગ્યા સુધી 24 કલાકમાં મુંબઈમાં 107 મિમી વરસાદ પડ્યો છે. હવામાન વિભાગના અધિકારીઓનું કહેવું છે કે બંગાળની ખાડી પર ઊભું થયેલું ઓછું દબાણવાળું ક્ષેત્ર 11 જૂન શુક્રવાર સુધી પૂરી રીતે તૈયાર થઈ જશે. તેને કારણે દક્ષિણ-પશ્ચિમના ચોમાસાથી ભારે વરસાદ પડશે, જે શુક્રવાર રાતથી લઈને શનિવાર સવાર સુધી મહારાષ્ટ્રના લગભગ દરેક કાંઠા વિસ્તારોને કવર કરશે.

મુંબઈ શહેરના કોલાબા ઓબ્ઝર્વેટરીએ શુક્રવાર રાત્રે 8:30 વાગ્યા સુધી 24 કલાકમાં માત્ર 23.4 મિમી વરસાદ નોંધ્યો છે. ઈન્ડિયન એક્સપ્રેસના રિપોર્ટ મુજબ, ભારે વરસાદ બાદ પણ પીવાના પાણીની સપ્લાય કરનારા 7 લેકમાં પાણીની અછત હજુ પણ છે. લેકોમાં કુલ ક્ષમતાની તુલનામાં પાણીનો સ્ટોક 12.68 ટકા છે. ગયા વર્ષે આ આંકડો 13.63 ટકા પર હતો. શહેરમાં પાણી ભાતસા, મધ્ય વૈતરણા, ઉપરી વૈતરણા, તાનસા અને મોદક સાગરથી આવે છે. તે થાણે અને નાસિક જિલ્લામાં છે.

હવામાન વિભાગ તરફથી મળેલી ચેતવણી બાદ BMC એક્શન મોડમાં આવી ગઈ છે. નીચાણવાળા વિસ્તારો અને મીઠી નદીની પાસે રહેતા લોકોને અન્ય સ્થળે શિફ્ટ કરવાની તૈયારી કરવામાં આવી રહી છે.

આ દરમિયાન વોર્ડ કાર્યાલયોને પડી ગયેલા વૃક્ષોને હટાવવાનું કામ આપવામાં આવ્યું છે. સાથોસાથ ઇમરજન્સી સ્થિતિ માટે તૈયાર રહેવા માટે કહેવામાં આવ્યું છે. મહારાષ્ટ્ર હાઉસિંગ એન્ડ એરિયા ડેવલપમેન્ટ ઓથોરિટી, ફાયર બ્રિગેડ, એનડીઆરએપી અને રાજ્ય ડિઝાસ્ટર મેનેજમેન્ટ ટીમોને તૈયાર રહેવા માટે કહેવમાં આવ્યું છે.