બિહારની 'લેડી સિંઘમ' જેને જોઈને ભલભલા ગુનેગારોને પરસેવો છૂટી જાય છે!

બિહાર પોલીસમાં આજકાલ લિપિ સિંહનું નામ ખૂબ ચર્ચામાં છે. 'મિશન અનંત' એટલે કે મોકમાના બાહુબલી ધારાસભ્ય અનંત સિંહની ધરપકડને લઈને મહિલા આઈપીએસને આજકાલ લોકો 'લેડી સિંધમ' કહી રહ્યા છે. સામાન્ય કદ-કાઠીની આ મહિલા આઈપીએસથી તેના વિસ્તારના અપરાધીઓ થરથર ધ્રુજે છે. એટલું જ નહીં લિપિ સિંહ અનંત સિંહ જેવા બાહુબલીઓ માટે પણ માથાનો દુખાવો બની છે. આ જ કારણ છે કે અનંત સિંહ તેના પર અનેક આરોપ લગાવી ચુક્યા છે.

કોણ છે લિપિ સિંહ? : લિપિ સિંહ જનતા દળ (યુનાઇટેડ)ના સાંસદ આરસીપી સિંહની દીકરી છે. આરસીપી સિંહ જનતાદળના સાંસદ છે, એટલુ જ નહીં તેમને બિહારના મુખ્યમંત્રી નીતિશ કુમારના સૌથી નજીકના માનવામાં આવે છે. તેઓ પૂર્વ આઈએએસ પણ છે. આરસીપી સિંહની દીકરી લિપિ સિંહે વર્ષ 2015માં સિવિલ સર્વિસ પરીક્ષા પાસ કરી હતી અને આઈપીએસ અધિકારી બની હતી.

2015ની સિવિલ સર્વિસ પરીક્ષામાં લિપિ સિંહને 114મો રેન્ક મળ્યો હતો. 33 વર્ષની લિપિ સિંહ નાલંદા જિલ્લાની પ્રથમ મહિલા આઈપીએસ અધિકારી છે. બિહારના નાલંદા જિલ્લાની ઓળખ આઈપીએસ અને આઈએએસની ખાણ તરીકે કરવામાં આવે છે. આરસીપી સિંહ મૂળ રીતે નાલંદા જિલ્લાના અસ્થાવાં પ્રખંડના મુસ્તફાપુર ગામના નિવાસી છે.

કાયદાનો અભ્યાસ : લિપિ સિંહનું સપનું આઈપીએસ બનાવાનું હતું. લિપિએ દિલ્હી યુનિવર્સિટીમાંથી લૉનો અભ્યાસ કર્યો છે. આઈપીએસ પહેલા લિપિ સિંહની પસંદગી એલાઇડ સર્વિસમાં થઈ ગઈ હતી પરંતુ લિપિએ નોકરી શરૂ કરવાને બદલે ફરીથી પરીક્ષા આપી હતી અને આઈપીએસ બની હતી.

પિતા IAS અધિકારી હતા : આરસીપી સિંહ રાજકારણમાં આવ્યા તે પહેલા આઇએએસ અધિકારી હતા. તેમણે યૂપી કેડરમાં ઘણા લાંબા સમય સુધી કામ કર્યું હતું. નીતિશ કુમાર જ્યારે કેન્દ્રમાં મંત્રી બન્યા હતા ત્યારે આરસીપી સિંહ દિલ્હીમાં તેમના અંગત સેક્રેટરી હતા. આ દરમિયાન બંનેએ ખૂબ લાંબા સમય સુધી કામ કર્યું હતું.

વર્ષ 2005માં જ્યારે નીતિશ કુમાર પ્રથમ વખત બિહારના મુખ્યમંત્રી બન્યા હતા ત્યારે આરસીપી સિંહ પ્રિન્સિપાલ સેક્રેટરી બનીને આવ્યાં હતાં. નીતિશ કુમારના કહેવા પછી તેમણે આઈએએસની નોકરી છોડી દીધી હતી અને તેમની પાર્ટી સાથે જોડાયા હતા. નીતિશ કુમારે તેમને રાજ્યસભાના સાંસદ બનાવ્યા છે.

લિપિ સિંહથી ગુનેગારો ધ્રુજે છે : લિપિ સિંહથી રેતી માફિયા અને ગુનેગારો ધ્રુજે છે. અનંત સિંહના ઘરે કરવામાં આવેલા દરોડાંની આગેવાની લિપિ સિંહે લીધી હતી. બાઢના એસએસપી તરીકે ફરજ બજાવતી વખતે લિપિ અનેક ગુનેગારો માટે માથાનો દુખાવો બની હતી. લિપિ સિંહે દારૂ, રેતી ખનન, હથિયારોના ગેરકાયદે વેપાર સહિતના કાળા કામો પર લગામ લગાવી હતી. અનંત સિંહના સમર્થકો પર લિપિનો દંડો અવારનવાર ચાલે છે. લિપિ વિશે કહેવામાં આવે છે કે તે પોતાના નીચેના અધિકારીઓને આદેશ કરવાને બદલે મોટાભાગના ઓપરેશનોની આગેવાની પોતે જ લે છે.